Астанада 180 аула мен қоғамдық кеңістік абаттандырылады

Фото: gov.kz

Астана қаласының әкімі Жеңіс Қасымбек Instagram парақшасында абаттандырылатын аумақтар жайлы жазды, деп хабарлайды елорда әкімдігінің ресми сайты.

"Елордамызды абаттандыру жұмысын жалғастырып жатырмыз. Қалада тұрғындар мен қонақтардың бос уақытын өткізуіне арналған орындар саны артып келеді. Биыл шамамен 180 аула мен қоғамдық кеңістік (саябақтар, гүлзарлар, желекжолдар) абаттандырылады. Абаттандыру барысында көгалдандыру жұмысына ерекше көңіл бөлінеді. Қаланы аралау барысында бірқатар нысанға бардым.

Мәселен, Байқоңыр ауданындағы "Тұлпар" сауда орталығының алдында ескі үйлер мен сауда нысандарын бұзу жұмысы жүріп жатыр. Көп жылдан бері бұл аумақ стихиялы саудаға байланысты проблемалы учаскелердің бірі болып келген. Биылдың өзінде бұл аумақ қайта жаңарып, орнына жаңа қоғамдық кеңістік ашылады. Тұрғындар үшін жаяу жүргіншілер аймағы, демалыс орындары ашылып, көгалдандыру және жарықтандыру жұмысы жүргізіледі. Аталған жұмысты кезең-кезеңімен жүзеге асырып, осы жылдың соңына дейін аяқтау жоспарланып отыр.

Тағы бір қоғамдық кеңістік Жұбанов көшесінде (Тархан көшесінен Пушкин көшесіне дейінгі аралықта) ашылады.

Гүлзардың жалпы ауданы 4,5 мың шаршы метрді құрайды. Абаттандыру аясында ауқымды көгалдандыру жұмысы жүргізіледі: көпжылдық бұталар мен ірі көшеттер отырғызылады.

Абай даңғылының Республика даңғылынан бастап Уәлиханов көшесіне дейінгі аралығы екі жағынан толық абаттандырылады. Абаттандырылатын аумақтың жалпы көлемі 1,1 гектарды құрайды. Жоба аясында көше жиһаздары орнатылып, жарықтандыру жұмысы және т.б. жүргізіледі.

Сарайшық шағын ауданында (Жүргенов гүлзары) еңбек пен жұмысшы мамандықтардың маңызына арналған арнайы тақырыптағы гүлзар жобасын іске асыру басталды. Жоба аясында көшеге арналған жиһаздар орнатылады, көгалдандыру жұмысы жүргізіледі және басқа да абаттандыру шаралары іске асырылады. Гүлзар тек тұрғындардың демалыс орны ғана емес, сонымен қатар қоғам тарапынан еңбекке деген құрметті арттыруға бағытталған қалалық ортаның маңызды элементіне айналмақ.

Тәшенев көшесінің бойында көгалды орын ашылды. Мұнда 500-ден астам ағаш отырғызылды. Аумағы толықтай автоматты суару жүйесімен жабдықталған.

Абаттандыру және көгалдандыру жұмысы қаланың барлық ауданында жүріп жатыр. Биыл да өткен жылдардағыдай бір миллионнан астам жасыл желек (бұталар, ағаштар, көшеттер) отырғызу жоспарланып отыр", – деп жазды Жеңіс Қасымбек.