Алматы полиция департаментінің жаңа басшысы тағайындалды
Арыстанғали Заппаров Алматы полиция департаментінің басшысы қызметіне тағайындалды, деп хабарлайды Stan.kz ақпарат агенттігі.
"Президент Әкімшілігімен келісім бойынша Алматы қалалық ПД бастығы қызметіне полиция генерал-майоры Заппаров Арыстанғали Расилханұлы тағайындалды. Қазақстан Республикасы Ішкі істер министрінің орынбасары Қайрат Сұнтаев Полиция департаментінің жаңа басшысын ұжымға таныстырды", – делінген хабарламада.
Арыстанғали Заппаров 1969 жылы дүниеге келген. Ішкі істер органдарында 1993 жылдан бастап жұмыс істейді. Басшылық қызметтерде көп жыл жұмыс істеген. 2019-2022 жылдары Ішкі істер министрінің орынбасары қызметін атқарған. 2022 жылдың қаңтарынан бастап Алматы облысы полиция департаментін басқарды.
Еске салайық, Алматы полиция департаментінің бұрынғы басшысы Қанат Таймерденов Ішкі істер министрлігі экстремизмге қарсы іс-қимыл департаментінің басшысы болып тағайындалған еді.