Алматы облысындағы балалар үйінің тәрбиеленушілерінен ұрланған ақша: Күдікті Таразда жасырынған
Алматы облыстық балалар үйінің әлеуметтік педагогы тәрбиеленушілердің қаражатын жымқырды деген күдікпен ұсталды, деп хабарлайды Stan.kz ақпарат агенттігі.
Жедел-тергеу тобы Таразда 30 жастағы әйелді ұстады. Ол Алматы облысындағы балалар үйінің әлеуметтік педагогы болып қызмет еткен.
"Күдіктіні жедел уәкілдер Алматыға жеткізді. Қылмыстық кодекстің 189-бабының 3-бөлігі "Сеніп тапсырылған бөтеннің мүлкін ірі көлемде иемдену немесе ысырап ету" бойынша сотқа дейінгі тергеудің бірыңғай тізілімінде тіркелген қылмыстық істің материалдары, сондай-ақ күдікті Алматы қаласының экономикалық тергеу басқармасына тапсырылды", - делінген хабарламада.
Еске сала кетейік, Алматы облыстық № 1 балалар үйінің әлеуметтік педагогы тәрбиеленушілердің шоттарынан ақша ұрлады деп айыпталған. Заңды түрде мекеме Алматы облысына кіреді, бірақ аумақтық жағынан қаланың Бостандық ауданында орналасқан. Сондықтан бұл факт қалалық полиция департаментінде тіркелді.