Ақтөбеде жөндеуіне өткен жылы 200 миллион теңге жұмсалған бөгет жарылды: Билік жаңа құрылысқа тағы ақша салмақ

Ақтөбе билігі былтыр ғана 200 миллион теңгеге күрделі жөндеуден өтіп, артынша жарылып кеткен бөгетті қалпына келтірмек. Бұл туралы Stan.kz ақпарат агенттігі хабарлайды.

Фото: Ашық дереккөзден алынды

Ақтөбе облысының әкімі Асхат Шахаров су тасқынынан зардап шеккен бөгетті аралап көрді.

Апатты бөгет былтыр ғана күрделі жөндеуден өткен екен. Бюджет қаржысына айналма каналдың түбі цементтеліп, су төгетін арнаға шлюздер орнатылды. Бұл жұмыстарға мемлекеттік бюджеттен 203 миллион теңге жұмсалған. Мемлекеттік сатып алуда талдықорғандық "СК Гранд Канал" компаниясы жеңіске жеткен.

Биыл 30 наурыз күні аталмыш Щербаков бөгеті жарылды. Салдарынан Ырғыз өзені арнасынан асып, жақын маңдағы Жүргенов ауылының тұрғындарын шұғыл түрде эвакуациялауға тура келді. 927 адам, оның ішінде 215 бала қауіпсіз жерге жеткізілді. 78 ауланы су басып, 10 үй қираған. Ауыл жарықсыз, сусыз, газсыз қалған.

Жақында облыс әкімдігінің бөгетті қайта қалпына келтіруге тағы да миллиондаған бюджет қаржысын жұмсайтыны белгілі болды. Әкімдіктің мәліметінше, облыс әкімі бөгеттің резервтік қуат көлемін ұлғайту, су қоймасының айналасында жаңа құлыптар мен өлшеуіш станцияларды орнатуды ескере отырып, Щербаков бөгетін қайта жаңарту, сондай-ақ түбін тазарту және тереңдету бойынша жоба дайындауды тапсырған.