Оқыс жағдай Қазығұрт ауданының Үлгілі ауылына жуырда ғана пайдалануға берілген мектептің спорт залында болған. 8-сыныптың оқушылары футбол ойнап жатыпты. Мұғалімнің айтуынша 13 жастағы Алихан қақпашы болып тұрған екен. Ал оқиға орнында болған дене шынықтыру пәні мұғалімінің серіктесі бәрі қас пен көздің арасында болғанын баяндады.

"Махатай Алихан қақпашы болып қақпада тұрған. Сол кезде мына қақпаға гол соғады да, балалар қуанған кезде Алихан да жүгіріп барып қақпаға, қуанып қақпаға асылады. Секірген кезде қақпа ауып кетеді. Біз мына жақтан жүгіріп барып тұрғыздық. Ол кезде баланың жағдайы жақсы еді. Алғашқы жәрдемімізді көрсетіп медбикені шақырдық. Арада он минуттай өткеннен кейін баланың жағдайы нашарлай бастады", - дейді М.Әуезов орта мектебінің дене шынықтыру пәнінің мұғалімі.

Жедел-жәрдеммен аудан орталығына жеткізгенмен оқушы ота үстінде жан тапсырған. Дәрігерлер оның қанын тоқтату мүмкін болмағанын айтты.

"Баланың ішкі органдары езіліп кеткен. Бауыр, бүйрек дегеннің барлығы езіліп кеткен. Қан тоқтау процесі мүмкін болмады. Бұл несовместимой жизнью дейміз ғой, соған байланысты бала сағат 12-де биологиялық өлім балада тіркелді", - дейді Наушарман Боранбаева Қазығұрт аудандық орталық ауруханасының бас дәрігерінің орынбасары.

Марқұмның денесі бүгін жер қойнына тапсырылды. Белгілі болғандай Алихан Махатай отбасындағы бес баланың кенжесі екен. Баланың жақындары жазмыш болғанмен, мектепте қауіпсіздік ережелері сақталмағанын айтып, тиісті жазаларын алсын деп отыр.

Талқылау