Алматыда мектеп басшылығы 4-сынып оқушыларынан құжаттарын алып, басқа мектепке ауысуын талап еткен

Алматы мектептерінің бірінде мектеп басшылығы 4-сынып оқушыларының ата-аналарына құжаттарын алып, балаларын басқа оқу орындарына ауыстыруды сұраған. Бұл туралы Stan.kz ақпарат агенттігі Еуразия арнасына сілтеме жасап хабарлайды.

Фото видеодан алынған

Ата-аналар бұл шешіммен келіспейді, сондай-ақ басқа мектептер де балаларды қабылдаудан бас тартқан. 

Алматыдағы №54 мектептің ата-аналарының айтуынша, мектеп басшылығы 4-сынып оқушыларының тең жартысын басқа мектептерге ауысуға мәжбүрлеп жатқан көрінеді. Себеп – аталмыш оқушылардың “Дарын” емтиханын тапсыра алмауы. 

“Тестілеу нәтижесі бойынша балаңыз қажетті балды жинай алмаса, құжаттарыңызды алып, балаңызды басқа мектепке ауыстыруыңыз қажет. Емтиханнан соң қосымшадан нәтижелерді көргенде балалар жылап жіберді”, – дейді 4-сынып оқушысының анасы Юлия Ма-Ва-Ухан. 

Экс-министр Мұхамедиұлына тиесілі құны 1,2 миллиард теңгеге бағаланған мектеп мемлекетке қайтарылды

Ата-аналардың айтуынша, мектеп басшылығы балаларды ауыстыруға болатын мектептердің тізімін берген. Алайда ол мектептердің барлығы балалар тұратын ауданнан алыс. Сондай-ақ аталмыш мектептер де балаларды қабылдаудан бас тартқан. 

Мектеп директорының айтуынша, мамандандырылған мектептерде 5-сыныпқа қабылдау конкурс бойынша жүргізіледі, тәртіп солай. Балалардың тізімі “Дарын” республикалық ғылыми орталығы өткізетін тестілеу нәтижесі бойынша жинақталады. Мектеп директоры бұл талап туралы ата-аналарға балаларын мектепке алғаш алып келген кезде-ақ ескертіліп, келісімі алынатынын атап өтті. 

Еске салсақ, бұған дейін Қазақстанда 136 мектеп Ресей және Қытай шекарасына жақын болғандықтан Starlink желісіне қосыла алмайтыны туралы жазған едік.