Қазақстандықтар ТМД елдері арасында ең көп жұмыс істейтін халық деп танылды
Қазақстан 2025 жылдың қорытындысы бойынша халықты жұмыспен қамту деңгейі ең жоғары әлемдегі ТОП-30 елдің қатарына енді. Бұл туралы Stan.kz ақпарат агенттігі хабарлайды.
Халықаралық еңбек ұйымы ұсынған соңғы есепке сәйкес, Қазақстанда халықты жұмыспен қамту деңгейі 67%-ға жеткен. Бұл көрсеткіш елімізді әлемдік рейтингте 187 мемлекет ішінен 29-орынға шығарды.
Ұйымның деректеріне сәйкес, Қазақстан бұл көрсеткіш бойынша тек ТМД кеңістігінде көшбасшы болып қана қоймай, Нидерланды, Швейцария, Франция, АҚШ, Финляндия, Норвегия, Швеция, Дания, Жапония және Қытай сияқты елдерді де айтарлықтай артта қалдырған.
Жұмыспен қамту деңгейі немесе жұмыспен қамту коэффициенті – еңбек нарығының жағдайын көрсететін маңызды көрсеткіш. Ол белгілі бір елдегі экономикалық белсенді әрі қаржылық тұрғыдан дербес халықтың үлесін пайызбен көрсетеді.
Жалпы алғанда, бұл коэффициент елде қаншалықты көп азаматтың жұмыс істейтінін, ішкі еңбек нарығында ұсыныстардың қаншалықты кең екенін, жеке бизнесті дамытуға жағдай жасалған-жасалмағанын, сондай-ақ мемлекеттен берілетін жәрдемақыға ғана өмір сүретін адамдардың үлесінің қандай екенін көрсетеді.
Есептеулерді Халықаралық еңбек ұйымы мамандары (БҰҰ құрамына кіретін мекеме) жыл сайын жүргізеді.
2025 жылдың қорытындысына сәйкес ТМД елдері арасында жұмыспен қамтылған әрі экономикалық белсенді халық саны бойынша көшбасшы – Қазақстан.
ТМД елдері арасында халықты жұмыспен қамту деңгейі бойынша екінші орынды Беларусь иеленіп, әлемдік рейтингте 67-орында тұр. Ал үшінші орында Ресей орналасқан, ол әлем бойынша 73-орында, жұмыспен қамту коэффициенті 60%-ға тең.
Бұл көрсеткіш бойынша ТМД елдері ішінде төмен нәтижелер Әзірбайжан (әлемде 74-орын, жұмыспен қамту коэффициенті – 60%), Қырғызстан (әлемде 111-орын, 55%), Өзбекстан (әлемде 114-орын, 55%), Армения (әлемде 129-орын, 52%) және Тәжікстан (әлемде 175-орын, 36%) елдерінде тіркелген.
ОқыңызӘлемдегі жағдай
Халықаралық еңбек ұйымының әлемдік рейтингінде халықты жұмыспен қамту деңгейі бойынша бірінші орынды Катар иеленді. Бұл елде тұрақты түрде жұмыс істейтін азаматтардың үлесі 87%-ды құрайды.
Екінші орынды Соломон аралдары (83%) иеленсе, үшінші орында Мадагаскар (83%) тұр.
Жұмыспен қамту деңгейі жоғары елдердің қатарында сондай-ақ Солтүстік Корея (79%), Біріккен Араб Әмірліктері (77%), Исландия (72%), Кувейт (72%), Вьетнам (72%) және Бахрейн (70%) елдері де бар.
Экономикасы дамыған елдер бұл рейтинг бойынша халықты жұмыспен қамту деңгейінің жоғары көрсеткішімен бұрынғыдай мақтана алмайды. Мұның басты себебі көбіне олардың азаматтары мемлекеттік жәрдемақылар есебінен өмір сүруді көбірек таңдап, жұмыс істеуге онша құлшыныс танытпайды деген тұжырыммен байланыстырылады.
2025 жылдың қорытындысы бойынша Нидерландыда жұмыс істейтін халықтың үлесі 65% (әлемде 40-орын) болса, Швейцария – 64% (43-орын), Норвегия – 63% (48-орын), Қытай – 62% (59-орын), Жапония – 62% (60-орын), Дания – 62% (62-орын), АҚШ – 59% (80-орын), Швеция – 59% (81-орын), Ұлыбритания – 59% (86-орын), Германия – 59% (87-орын), Финляндия – 55% (117-орын) және Франция – 52% (134-орын).
Рейтингтегі ең соңғы орындарда халықты жұмыспен қамту деңгейі ең төмен Сомали (27%), Джибути (24%) және Сан-Томе және Принсипи (21%) елдері тұр.
