Нұрсұлтан Назарбаев қоры Костенко шахтасында қаза тапқандардың отбасыларына 50 миллион теңге бөлді
Нұрсұлтан Назарбаев қоры Қарағанды облысында қаза болған кеншілердің отбасыларына 50 миллион теңге көлемінде көмек көрсетеді. Бұл туралы Stan.kz ақпарат агенттігі хабарлайды.
Хабарламада Нұрсұлтан Назарбаевтың апатқа алаңдағаны айтылған.
"Костенко атындағы шахтада болған қайғылы оқиғаға қатты алаңдаған еліміздің тұңғыш президентінің тапсырмасы бойынша Нұрсұлтан Назарбаев қоры қаза тапқан кеншілердің отбасыларына 50 миллион теңге көлемінде тікелей қаржылай көмек бөлді", – делінген хабарламада.
Еске салайық, апаттан кейін президент Қасым-Жомарт Тоқаев Қазақстан үкіметіне "АрселорМиттал Теміртау" АҚ-мен ынтымақтастықты тоқтатуды тапсырған еді. Қарағанды облысында кеншілердің өліміне қатысты қылмыстық іс қозғалғаны белгілі болды. Үкімет "АрселорМиттал Теміртау" АҚ меншігін Қазақстанның пайдасына беру жөніндегі мәміле қазірдің өзінде аяқталып жатқанын мәлімдеген.
Айта кетейік, бұған дейін егер Лакшми Миттал кінәлі деп танылса, құқық қорғау органдары оны жауапқа тартуға құқылы екені айтылған.
Қазақстанда Лакшми Митталды қылмыстық жауапкершілікке тартуды талап ететін петицияға қол жинау басталды.
31-қазанда төтенше жағдайлар министрі Сырым Шәріпханов Қарағанды облысындағы Костенко шахтасында қаза тапқан кеншілердің соңғысының денесі табылғанын мәлімдеді.
Премьер-министрдің бірінші орынбасары Роман Скляр құпия сақтап отырған "АрселорМиттал Теміртаудың" болашақ иесінің Ресей президенті Владимир Путинмен және ресейлік олигархтармен байланысы барын үзілді-кесілді жоққа шығарды.