Лотереяда қомақты қаржы ұтқан азамат әйелінен қашып кеткен
Таиланд азаматы ұтыс билетін алып, әйелінен қашып кеткен, деп хабарлайды Stan.kz ақпарат агенттігі.
Сурет: asiaone.com
Өткен сенбі, қарашаның 16-сы күні Порнтида Чамнанвет пен оның күйеуі Виджак Ваннапрасит лотерея билетін сатып алады. Нәтижесінде 6 миллион бат ұтады (76,8 млн теңге).
Ұтысты полиция бөлімшесіне тіркеген жұбайлар, қажетті құжатқа қол қойған соң ақшаны екауара тең бөліп аламыз деп келіскен. Алайда келесі күні, Ваннапрасит әйеліне тек ақшаның 1/3-ін ғана беремін дейді. Арада жанжал туып, қатты ұрысқан соң күйеуі билетті алып кетіп қалған.
Қарашаның 17-сі әйелі жергілікті полицияға шағымданып, жолдасының ұтыс қаржысын алып қоймауын сұрап арыз жазған. Адвокаттың айтуынша, лотерея билетін заңсыз меншіктеп алғаны үшін Ваннапрасит үш жылға бас бостандығынан айырылуы мүмкін еді.
Оқиға Таиланд БАҚ-та кеңінен таралғандықтан, ұтысты алып қашқан жолдасы қайта оралады. Қаржыны теңдей бөлуге уәде береді. Осыдан соң жұбайлар қайта татуласып, билетті қолма-қол ақшаға айналдырмақ.