Алматылықтар бір жарым күн ішінде 100 литрге жуық қан тапсырды
Алматыда лаңкестік әрекет салдарынан зардап шеккендерге көмек көрсету мақсатында қала тұрғындары екі күн ішінде 100 литрден астам қан тапсырды.
Бұл туралы бүгін Алматыда брифинг барысында Алматы қалалық Денсаулық сақтау басқармасының бас хирургі Нұржан Исабеков хабарлады.
«Әлеуметтік желілерде лаңкестік әрекет салдарынан зардап шеккендерге қан жетіспей жатыр дегендей жалған ақпараттар таратылып жатыр. Шын мәнісінде қан жетеді. Барлық зардап шеккендерге толықанды кешенді медициналық көмек көрсетілуде. Кеше ерікті түрде 221 адам келіп қан тапсырса, бүгін күндізгі сағат 14:00-дегі жағдай бойынша 219 адам қан тапсырды. Олардың арасында қала тұрғындары, жастар, студенттер, дәрігерлер, құқық қорғау органдарының өкілдері және әскерилер бар», – деді Нұржан Исабеков.
Сонымен қатар, оның айтуынша, зардап шеккендердің барлығы дерлік кеуде тұстарынан, іштен және аяқ-қолдарынан жарақат алған.
Бүгін Алматыда тағы бір полицей қызметкерінің көз жұмғанынхабарлаған едік.
Бүгін шаһар басшысы қаза тапқандардың отбастарына 15 млн теңгеден қаржылай көмек көрсетілетіндігін хабарлаған еді. Қазіргі таңдаауруханада үш адам ауыр халде жатыр.
Дүйсенбі, 18 шілде күні Алмалы аудандық полиция басқармасына, сосын ҰҚК департаменті ғимаратына шабуыл жасалды. Нәтижесінде 5 адам қаза тауып (үш полицей, бір шекара қызметкері және бір бейбіт тұрғын), 8 адам зардап шекті. Билік аталған оқиғаға теракт деп баға берді. Ал ұсталған күдікті бұрын сотталған 26 жастағы Қызылорда облысының тумасы екен.
Біраз уақыт бұрын ғана ішкі істер министрі қаскөйдің полициядан кек алмақ болып шабуыл жасағанын айтты. Кейінірек қалада болған атыстың бейнежазбасы да пайда болды.