АҚШ-тың USAID агенттігі ресми түрде жабылды

Фото: Getty Images

АҚШ мемлекеттік хатшысы Марко Рубио халықаралық даму жөніндегі АҚШ агенттігінің (USAID) жабылғанын әлеуметтік желі X арқылы хабарлады. Оның айтуынша, бұл шешім президент Дональд Трамп қаңтарда бастаған ауқымды реформаның бөлігі. Бұл туралы Stan.kz ақпарат агенттігі хабарлайды.

Сол кезде Трамп шетелдік көмек бағдарламаларын 90 күнге тоқтатып, олардың тиімділігін қайта қарауды тапсырған еді.

"Қаңтардан бері біз салық төлеушілерге ондаған миллиард доллар үнемдедік. USAID ресми түрде жабылады, ал негізгі бағдарламалар Мемлекеттік департаментке берілді", – деді мемлекеттік хатшы.

The Guardian дерегінше, 2025 жылдың 30 қыркүйегіне дейін USAID-тің барлық шетелдік өкілдіктері жабылады, ал агенттіктің 83 пайызы бағдарламалары қазірдің өзінде тоқтатылған.

5 наурызда Конгреске жасаған жолдауында Дональд Трамп USAID шығындарын, соның ішінде шетелде ЛГБТ құқықтарын қорғауға жұмсалған 40 миллион долларды "күмәнді" және "мағынасыз" деп атады. Ол әсіресе Қазақстандағы ЛГБТ қауымдастығын қолдауға бөлінген 10 миллион долларға ерекше назар аударды.

The New York Post ақпаратына сәйкес, Трамп әкімшілігі шетелдік көмекті 5 миллиард долларға қысқартуды жоспарлап отыр, оның 3,2 миллиарды USAID бағдарламаларына арналған. Бұған дейін Lancet журналы USAID бағдарламаларының тоқтатылуы алдағы жылдары гуманитарлық көмектің қысқаруына байланысты 14 миллионнан астам адамның өмірін қиюы мүмкін екенін ескерткен.

Еске салайық, бұған дейін USAID Қазақстанда азаматтық қоғамды дамыту мен ЛГБТ-ға қанша қаражат бөлгені белгілі болғанын жазған едік.