Ақтөбе облысы Мұғалжар ауданының теолог қызметкері Әділет Маусымовтың үстінен әйелінің сіңілісі шағым түсірмек. Айтуынша, бұрын ауыл имамы болған жездесі жындар туралы әңгімелерімен апасын адам танымастай етіп өзгертіп жіберген. Бұл туралы ақпарат алдымен әлеуметтік желіде тарады. Қоғам назарын туғызды.

Дін қызметкерінің балдызы отбасылық зорлықтың құрбаны болған әйелдің күйзеліске түскенін баяндап берді. Қиын жағдайда қалған апасын күйеуінің үйінен алып кеткен.

“Мен Жанат Қалымбетованың туған сіңілісімін. Тәтемнің жағдайы қазір жақсы. Бүгінде Қызылорда қаласында, балаларымен бірге анам екеуміздің қасымызда тұрады. Ол бұрын ауырмады, тұрмысқа шыққанға дейін сап-сау адам болды. Тәтем жуас. Ондағы күйзеліс тұрмысқа шыққаннан кейін пайда болды. Күйеуі үнемі жындар туралы айта берген. “Қасыма жатпасаң періштелер қарғайды, үйде жын болады” деп бәрін жынмен байланыстырып айтқан. Тәтем қорқып қалған. 2019 жылдан бері қолына ақша алып, өзі жұмсап көрмеген. Тәтемнің жеке куәлігі де өзінде жоқ. Жездем оны бізге бермеді, қайта жасатуға тура келді”, – деді бұрынғы имамның балдызы Гауһар Қалымбетова.

Балдызы бұрынғы имамның отбасындағы зорлық-зомбылық туралы әлеуметтік желіге жариялады, көпшіліктен көмек сұрады. Айтуынша, 32 жастағы келіншектің күйзеліке ұшарауына дін жолындағы күйеуі кінәлі.

“Жағдайды әлеуметтік желіге салуымның себебі жездем тәтемде “психикалық ауытқуы бар” деп отыр. Тәтем зорлық-зомбылықтан қорқып қалған. Өзі әлеуметтік желіге айтып шыға алмайды. Ұзақ уақыт қоғаммен араласпаған. Жездем қазір теолог, бұрын имам болған. Қорғаушымыз бар, сотқа арыз түсіреміз. Бірінші алиментке арыз жазамыз. Қазір тәтемнің денсаулығын қаратып жатырмын. Рас, тәтем 2018 жылы жүйке аурулар ауруханасында емделген. Қазір дәрі-дәрмек қабылдамайды. Қызылорда қаласындағы жүйке аурулар ауруханасына көрсеттім. Жағдайы жақсы, бойында қорқыныш барын айтып, дәрі жазып берді. Шизофрения белгілері жоқ. Бұл туралы да сотқа арыз түсіреміз. Экспертизадан өткізіп, тәтемді жүйке аурулар бойынша есептен шығартамын. Оны “ауру” деп 2019 жылы есепке қойған. Бірақ ол кезде комиссия құрамы болғаны туралы мәліметтер жоқ. Сондықтан сот арқылы анықтаймыз. Тәтем тұрмысқа шыққанға дейін жүйке ауруымен ауырмаған. 2014 жылы тұрмысқа шықты. 2017 жылы екінші қызын босанады, 2018 жылы ауырады. Тәтем ауруханаға денесі көгеріп түскен кездер болды. Бүгінде төрт баланы өмірге әкелді. Ешқайсысына зияны тиген жоқ. Балалар да әкесінен қорқып қалған. Психолог көмегімен балалардан әкесінің қандай қысым көрсеткені туралы жауап алғанын қалаймын. Мұның бәрі сот арқылы шешіледі деп ойлаймын. Тәтемнің банк картасын иемденіп, балалардың жәрдемақысын да өзі алып келген. Үшінші баласынан кейін дәрігерлер бала тууға болмайды деп ескертті. Тәтеме жүктіліктен қорғану туралы айтқанымда “болмайды, күйеуім рұқсат етпейді” деді. Бірақ жездем жоспарлы түрде көпбалалы болу үшін төртіншісін туғызды. Ол адам бұрын Жаңажол ауылында имам болды. Қазір теолог”, – деді Гауһар Қалымбетова.

Ал дін қызметкерінің өзі мұны өзіне тағылған айып деп санайды. Сондықтан балдызы мен енесін сотқа бермек.

“Балдызым маған шабуыл жасап жатыр. Жұбайыммен ажырасу турасында қысым көрсетті. Ажыраспайтынымды айттым. Себебі қазір әйелімнің ауыратын уақыты. Көктем, күз айларында ауырады. Жүйке жүйесі ауруханасында емделді. Тағылған айыптың бәрі жалған. Еш дәлел жоқ. Әйелімнің ауырған кезін пайдаланып, қарсы қойып тұр. 29 қазан күні жақын қарындасымның басын қарайтуға Шымкентке кеттім. Әйелім “апа, ағаларға сәлем айт” деп далаға дейін шығарып салды. 31-ші қазанға дейін қыздарыммен сөйлестім, одан кейін байланыса алмадым. Сол күні учаскелік полиция хабарласып, үстімнен енемнің арыз жазғанын хабарлады. Ұрған деп көрсеткен. Бәрін тастап жеттім. Келгенде қыздарым, отбасым жоқ. Алып кеткен. Кейін
мектептен балалардың құжатын алуға келді. Мен “Е-өтінішпен” білім бөліміне арыз жазып тастадым. Әйелімнің жағдайына байланысты балаларымлы бере алмайтынымды айттым. Заңды әкесімін. Балаларымды басқа жаққа жібере алмаймын. Әлеуметтік желіде тараған видео мектепте түсірілген. Айқай шығарып жатқан соң қолхат жазып шығып кеттім. Мен ешкімді кінәламаймын. Маған да оңай емес. Жалған ақпарат үшін енем мен балдызымды сотқа бердім”, – деді Әділет Маусымов.

Қазіргі уақытта ерлі-зайыптылардың төрт қызы анасының қасында. Мектеп жасындағы екі бала Қызылорда қаласындағы жеке мектепке барып жүр.

“Балардың әкесі Маусымов Әділет Маусымұлы Мұғалжар аудандық жастар арасындағы дін мәселесі және қоғам мен байланыс жөніндегі орталық басшысы. Анасы Жанат Қалымбетова үйде. Екі бала мектеп жасында. Бір бала шағын орталыққа барды. Кішісіне 11 ай. Қазіргі таңда балалар Қызылорда қаласындағы мектеп - интернатына орналасты. Мектеппен хабарластық, оқушылардың орналасқанын растап отыр. Қазіргі уақытта отбасы заңды түрде ажырасу мәселесі бойынша сотқа арыз түсірген”, – деді Мұғалжар аудандық білім бөлімінің басшысы Бахраман Аманжол.

32 жастағы Жанат Қалымбетованың өміріне қатысты өзгерістерді алдағы уақытта да бақылауда ұстаймыз.

Талқылау