Ұлықбек Есдәулет қазақстандықтарды арандатушылыққа берілмеуге шақырды
Ақын, Қазақстан жазушылар одағының төрағасы Ұлықбек Есдәулет елде болып жатқан жағдайға байланысты халықты арандатушылыққа берілмеуге шақырды, деп хабарлайды Stan.kz ақпарат агенттігі “ҚазАқпаратқа” сілтеме жасап.
"Зиян келтірместен, қоғамның бірлігін сақтап қалу маңызды. Біздің жастарымызға айтайын дегенім осы. Бізге бірінші кезекте мәдениет керек. Тәртіпсіздік деген жақсы емес. Қоғамның деңгейін көтереміз, еліміздің дамуын ілгерілетеміз десек, шегінбеуіміз керек. Біржақты айыптаудан аулақпын. Бастысы – арандатушылыққа берілмеу. Ол бақылау шараларына әкеп соғады", – деді ақын.
Бұдан бөлек, қаламгер билік пен халық арасында көпір орнаудың орнына, диалогтың бұзылғанын атап өтті.
"Жаңа Үкімет бұл сұрақты оңды шешеді деп үміттенеміз", – деді ақын.
Ұлықбек Есдәулет ақын-жазушылардың парызы жайлы айтты.
"Әлеуметтік толқуларға қарамастан, ақындар мен жазушылар әрқашан халықтың жағында. Олардың парызы мен міндеті – халықтың қалауын жеткізу. Болып жатқан оқиғаға қатысты қатты алаңдап отырмыз. Барлығы бейбіт жолмен шешіледі және халықтың талабы орындалады деп үміттенеміз", – деді ақын.