Тоқаев Байденге көңіл айтты
Қасым-Жомарт Тоқаев Джозеф Байденге көңіл айту жеделхатын жолдады. Бұл туралы Stan.kz ақпарат агенттігі хабарлайды.
Фото: Ақорда
“Мемлекет басшысы Жаңа Орлеан қаласындағы қайғылы оқиға салдарынан көптеген адамның қаза болғаны туралы суыт хабарды күйзеліспен қабылдағанын жеткізіп, АҚШ Президенті мен жақынынан айырылған отбасыларға өзінің және Қазақстан халқының атынан көңіл айтты”, – делінген Ақорданың хабарламасында.
Сонымен қатар президент зардап шеккендердің тезірек сауығып кетуіне тілектестік білдіріп, мұндай қастандық әрекетті қатаң айыптайтынын жеткізді.
Еске салсақ, бұған дейін АҚШ-тың Жаңа Орлеан қаласында белгісіз қылмыскер теракт жасап, көпшілікті жүк көлігімен басып, содан кейін оқ жаудырғаны туралы жазған едік. Теракт салдарынан 15 адам көз жұмды.
Сонымен қатар, АҚШ-тағы Трамп қонақүйінің алдында Tesla көлігі жарылып кетті. Жергілікті билік көлік жарылысынан бір адам қаза тауып, бірнеше адам жараланғанын хабарлады. Құқық қорғау органдары Tesla көлігіндегі жарылысты теракт деп санайды.