“Оператор РОП” ісіне қатысты сот отырысы: Айыпталушылар БАҚ-та фото-видео жариялауға тиым салуды сұрады

Елордадағы Байқоңыр аудандық №2 сотында "Оператор РОП" ісіне байланысты сот отырысы жалғасуда. Бұл жолы айыпталушылар соттан фото және видео материалдарды БАҚ беттерінде жариялауға тиым салуды сұрады деп хабарлайды Stan.kz ақпарат агенттігі. 

"Оператор РОП" компаниясындағы қаржы жымқыру ісіне байланысты сот отырысында бұрғынғы экология және табиғи ресурстар вице-министрі Ахметжан Пірімқұловтың адвокаты соттан фото және видео жасауға әрі жариялауға тиым салуды сұрады. Оның себебін адвокат “экс-шенеуніктің БАҚ беттеріндегі суреттері балаларына кері әсер етуі мүмкін” деп түсіндірген. 

Сонымен қатар айыпталушылардың бірі, компанияның экс-Басқарма төрағасы Медет Құмарғалиев те аталған талапты қолдады.

Аталған мәселе бойынша шешім шығару бейсенбі, яғни 20 сәуірде өтетін сот отырысына қалдырылды.

Еске салайық, бұған дейін айыпталушылар "Оператор РОП" ісіне қатысты Әлия Назарбаеваны сотқа шақыруды сұраған еді.