Ұлттық қауіпсіздік комитеті төрағасының орынбасары Нұрғали Білісбековтің мәліметінше, күні бүгін Сирия мен Ирактың отты аймағында 16 жасқа дейінгі 390 қазақстандық бала бар. Соның 214-і – ұл, 176-сы – қыз бала. «Ол балалардың бәрінің дін аман екенін біле алмай отырмыз. Себебі, балалар ДАИШ-тың құрсауында қалған соғыс болып жатқан аймақта», – дейді ҰҚК өкілі.

Бұдан 6 жыл бұрын Жанар (есімі өзгертілді) Пәкістан аймағында жүрген Ресей азаматымен интернет арқылы танысып, тұрмысқа шығу мақсатында жолға шығады. Ата-анасын, туған жерін тәрк етіп, қауіпті жолға бет түзеуге сол кездегі 23 жастағы қызға не әсер етті? Сөйтсек, бұл сұрақтың бір-ақ жауабы бар екен.

Ол – діни сауатын мешіттен, имамдардан ашпағаны. Жанар исламды бұрмалаушылардың ықпалымен елімізде мойындалған дәстүрлі Ханафи мазхабынан бас тартып, намазды Ханбали мазхабымен оқып, діни сауатын интернет арқылы ашып, санасын бөтен ағымға жаулатқан.

“Ол жерге шариғат бойынша жақсы тұрамыз деп ойлап барғанмын. Бірақ Пәкістан мұсылмен елі болса да, ол жерде ислам жоқ сияқты. Әйелді адам санамайды, дамымаған ел екен. Үйлері саз балшықтан салынған, жарық жоқ. Төбемізден үнемі бомба тастап жатты. Оның үстіне жергілікті тұрғындар мен әскерилер бізге күн көрсетпеді. Біз Уәзірстанда 1 жыл 3 ай ғана тұрдық. Тұңғышымыз сол жерде дүниеге келді. Нашар тұрмысқа шыдай алмадық.

Түркияға өтіп, Стамбұл қаласына тұрақтадық. Екінші қызым сол жерде дүниеге келді. 2014-жылы халифатқа жиналдық. Хадис бойынша халифат жарияланған жерге хиджра істеу керек. 2015-жылы екі баламызды алып, Сирияға кеттік”, – дейді Жанар.

Жанардың айтуынша, олар Сирияда соғыс болып жатқанын білмеген.

“Жоқ, барғанға дейін түк білген жоқпыз. Түркияда тұрғанымызда бейнероликтер қарадық. Әдемі түсірілген роликтер. Аурухана, жақсы дәрігерлер, балалар ойнайтын алаңқайлар… Тұрмыс тегін, нағыз жұмақ болар деп ойлағанбыз”, – дейді ол.

Сонымен қатар олар Сирияда адам төзгісіз жағдайда өмір сүріпті.

“Барақта тұрам деп ешқашан ойлаған жоқпын. Барамыз, бізге тегін үй береді, бәрі тегін, рахат, мұсылмандар арасында тату-тәтті өмір сүреміз деп ойладық. Бізді Ракка қаласына апарды. Адам тұратын жер емес. Күйеуімді бірден алып кетті… Әйелдерді балаларымен 3 бөлмелі үйге орналастырды. Әйелдер балаларымен сол үйден шықпай отырып, күйеулерін күтеді. Кішкентай бір бөлмеде 15 адам тұрдық. Сыртқа шығармайды. Балалар ауыра бастады. Ал емдейтін дәрігер жоқ. Барының өзі түк білмейді, ылғи топас. Аурухана лас, еш пайдасыз бір антибиотикті балаға да, үлкенге де бере береді. Ота жасарда үстіндегі киіммен жатқызады да, сол жерде бірден ота жасап, екінші бөлмеге апарып, лақтырып тастайды. Шаң болып жатқан құралмен ота жасайды да, ол құралды сол жерге қайта лақтырып тастайды және екінші адамға жумай қолдана береді. Әйелдер жеңілденгенде де сол…”, – дейді Жанар.

Ол Сирияға келгеннен кейін күйеуін 3 ай бойы көрмеген екен.

“Жоқ, соғысқа салмады оны. Қару қоймасында істеді. Сирияға барған отбасын сол күні-ақ екі жаққа бөліп жібереді. Күйеулері басқа жерде шариғат сабағын алады, әскери дайындықтан өтеді. Ал әйел-баласы қамауда отырады. Сол әкеткеннен күйеуімді 3 ай көрмедім. 3 айдан соң ол келіп, бізді алып кетті.

Сирияға келісімен күйеуің сол жердегі ұйымға, жамағатқа кіреді. Жамағатта болмасаң, сені бірден түрмеге жабады. Ал солардың қарамағына кірген соң қайда жұмсаса да, барасың. Топқа бөліп тастайды, біреуі кеңседе құжатпен отырады, біреуі қару жинайды, тазалайды, біреуін соғысқа салады. Сол үшін ақша алып тұрады”, – дейді Жанар.

Сонымен қатар Жанар Сирияда шариғат заңы сақталмайтынын, ол жерде ДАИШ бастығының ережесі заң екенін айтуда. ал қарсы шаққандар түрмеге қамалады екен.

“Ол жердегі өмір біз ойлағандай, шариғат бойынша емес, керісінше екен. Шынында да, ислам жоқ ол жерде. ДАИШ-тың бастығының ережесімен жүруің керек. Қарсы шықсаң, түрмеге қамайды. Ақида жағынан сабақ беретін «браттардың» айтқанын теріске шығарған ДАИШ-тың адамдары «Жоқ, сен олай үйретпе, айтқанымызды үйрет» деп бұйырады. «Браттарды» түрмеге қамап, өз адамдарына сабақ бергізеді. Видеода «Бізге келіңдер, ұнамаса, кері кете беріңдер» дейді. Алдап шақырып алады, келдің бе, кері кете алмайсың, ол жақтан кері шығу өте қиын. Еркектерді жертөлеге 2-3 ай қамап, сол жерде жазалайды, өлтіреді. Кетіп бара жатқан адамды «кафирлар» дейді. Өлтіріп тастайды да, отбасына «жол апатынан өлді» деп өтірік айтады. Ол жерде қаншама «сестралар» жылап отыр кері кете алмай, қор болған балалар қаншама? Сонда бұл сұмдықтың несі ислам? Мосулда көп адам тұтқында отыр. Көбі қашып жатыр, бірақ жолда ұсталып өледі. Ол жерде ешқандай халифат жоқ”, – дейді Жанар.

Жанардың сөзінше, Сирияға барған адамның бүкіл өмірі бұзылады, қор болады. Ал елімізде жұмыс, үй бар, бала тәрбиелеп, бақытты өмір сүруге бар жағдай жасалған. Сириядағы ахуалды өз көзімен көрген қазақстандық әйел отандастарын жалған үндеуге еріп, Сирияға бармауға шақырады.

Оқи отырыңыз:

Ақтөбеде мамандығы бойынша жұмыс таба алмаған 24 жастағы жігіт өз кәсібін ашып алды

Ақтөбедегі автобус өртінен аман қалғандардың туыстары өз шындықтарын айтты

ІІМ Ақтөбеде 52 адамның өмірін жалмаған автобустағы өрттің себебін атады

Автобус иесі Ақтөбедегі өрттен кейін Қазақстанға келіп, жағдайды ауызекі біліп қайтқан

Талқылау