Бетінің бір бөлігінен айырылған: Әйел хирургтардың көмегімен қолына мұрын салғызды
Франциядағы Тулуза қаласының тұрғыны қатерлі ісік ауруының кесірінен бетінің бір бөлігінен айырылып, кейін білегіне жаңа мұрын өсірді, деп хабарлайды Stan.kz ақпарат агенттігі Daily Star сайтына сілтеме беріп.
Аты-жөні айтылмаған әйелге мұрын қуысының қатерлі ісігі диагнозы қойылған. 2013 жылы ол химиотерапия мен сәулелік терапиядан өтті. Ем нәтижесінде француз әйел бетінің едәуір бөлігін, соның ішінде мұрнын жоғалтты.
Дәрігерлер науқастың мұрнын бірнеше рет қалпына келтіруге тырысты, бірақ ол сәтсіз болды. Әйел мамандармен кеңесті. Олар заманауи медициналық технологияны қолдана отырып, әйелдің қолына жаңа мұрын өсіріп, содан кейін оны бетке трансплантациялау туралы шешім қабылдады.
Дәрігерлер жаңа мұрынның пішінін 3D принтерде жасап, биоматериалды басып шығарды, содан кейін оны науқастың білегіне қойды. Жасанды шеміршектің табиғи қасиеттері мен формасы бар. Сарапшылар француз әйелдің самайдағы терісін алып, оны жаңа мұрын жасау үшін пайдаланды.
Осыдан кейін жаңа мұрын екі ай бойы әйелдің қолында өсті, содан кейін оны алып тастап, бетіне ауыстырды.
Тулуза университетінің ауруханасы мен Клаудиус Рего институтының мойын-бет хирургтары қолдағы қан тамырларын бет тамырларымен байланыстыру үшін күрделі технологияларды қолданды. Ота сәтті өтіп, науқас жаңа мұрынға ие болды. Осыдан кейін ол үш апта бойы антибиотиктерді қабылдады.
Мұндай ота алғаш рет жасалған. Науқас жаңа мұрынмен иіс сезе алу-алмауы әлі белгісіз.