Соңғы жаңалықтар
Соңғы жаңалықтар

"Банктер несие беруді азайтады": Қазақстанда халыққа берілетін кредиттерге салық мөлшерін көбейту ұсынылды

Қазақстанда халыққа берілетін несие есебінен салық мөлшері көбеймек. Жаңа кодекстің үкіметтік нұсқасында банктерге салынатын корпоративтік табыс салығын 25 пайызға дейін көтеру ұсынылған. Ол қабылданса тұтынушылық несие берген қаржылық ұйымдар мемлекетке көбірек төлейді. Бұл туралы Stan.kz ақпарат агенттігі Информбюро бағдарламасына сілтеме жасап хабарлайды. 

Ұлттық экономика министрі Серік Жұманғариннің айтуынша, қарызды бизнеске беретіндерге жеңілдік жасалады. Ал қаржыгерлердің айтуынша, Қазақстанда тұтынушылық несие беретін банктерге корпоративтік табыс салығын көтеру жоспар жүзінде қалмайды. Бұл шара әуелі бюджетті толтыру үшін қажет болған. Себебі үкімет банктер тұтынушылық несиелерден мол табыс табады деп санайды. Енді оларға салық көтерілсе, халыққа кепілсіз несие алу қиындауы мүмкін. 

"Біріншіден, банктер несие беру талабын барынша күшейтеді. Екіншіден, клиенттің төлем қабілетін есептеуді көбейтеді. Банктер тұтынушылық несие беруін азайтуы да ғажап емес. Себебі олар да шығынға батқысы келмейді. Кей қаржылық ұйымдар несие саясатын мүлдем басқа арнаға бұруы да мүмкін", – дейді Қаржыгерлер қауымдастығының бас сарапшысы Рамазан Досов.



Ұлттық экономика министрі Серік Жұманғариннің айтуынша, бұл өзгеріс банктерді тұтынушылық несиеге емес, бизнесті кредиттеуге тарту үшін қажет. Өйткені жаңа салық кодексінің үкіметтік нұсқасында кәсіпті қаржыландыратын ұйымдарға салықты 20 пайыз мөлшерінде қалдыру ұсынылған.

"Экономиканың нақты секторын кредиттеуден алынған кірістер бойынша 20 процент мөлшерінде мөлшерлемені сақтай отырып, банктер үшін корпоративтік табыс салығының мөлшерлемесін 25 пайызға дейін арттыру көзделетінін атап өткім келеді", – дейді Жұманғарин. 

Кредиттердің түріне қарай банктер әртүрлі сомада салық төлеуі мүмкін. Қаржыгерлердің айтуынша, бұл өзгеріс ипотека мен автонесиеге, депозитке әсер етпеуі қажет. Бірінші кредиттік бюроның статистиканы сүйенсек, ақпанда қазақстандықтар 838 млрд теңге кепілсіз тұтынушылық қарыз алған. Бұл көрсеткіш қаңтарға қарағанда 4% аз.

Айта кетейік, бұған дейін Қаржы нарығын реттеу агенттігінің мәліметінше, елімізде 881 мың адам банктерге қарызын төлей алмай жүргені туралы жазған едік. 

Талқылау