"Жүзетін кезең басталды”: Астанада Сауран көшесін су басты
Астанада Сауран көшесін су басты. Желіде су кешкен көліктердің видеосы тарады. Бұл туралы Stan.kz ақпарат агенттігі хабарлайды.
Фото: желі кадрларынан
Жергілікті тұрғындардың мәліметінше, су Сығанақ пен “Ануар” супермаркеті аралығын алып жатыр. Жұрт көшедегі тола судың әсерінен қозғалыстың нашарлағанын жазды.
“Мектепке қалай барамыз?”, “Жүзе аласың деп үміттенемін”, “Бұл тұрақтылық қой”, “Қайта ертең сырғанаймыз”, “Жүзетін кезең басталды”, – деп әзілдеп жазды жұрт.
Бұл оқиғаға байланысты Stan.kz тілшісі “Астана су арнасынан” пікір сұрады.
“Сауран көшесі, 10 мекенжайында құдықтан су кетті. Оқиға орнына жедел бригада бірден барды. Судың тасуының алды алынды. Қазір апаттық бригада жолдарды тазарту жұмыстарын аяқтап жатыр. Су штаттық режимде жұмыс істейтін жаңбыр суын ағызатын арнаға жиналады. Тұрғын үйлер мен кешендерде сумен қамту ажыратылмады”, – деп жауап берді ведомство.