Соңғы жаңалықтар
Соңғы жаңалықтар

Депутат Алматыдағы бірқатар тұрғын үйді салған ірі компанияның заңсыздықтарын мәлімдеді

Мәжілісмен Абзал Құспан Сыбайлас жемқорлыққа қарсы іс-қимыл агенттігінің төрағасы Асхат Жұмағалиге депутаттық сауал жолдап, Алматыдағы ең ірі құрылыс компаниясы "Qazaq stroy"-дың жұмысын жан-жақты тексерілсін деп талап қойды. Бұл туралы Stan.kz ақпарат агенттігі хабарлайды.

Фото: mazhilis_kz / видеодан скриншот 

Депутат компания айналасында болып жатқан заңсыз фактілерді мемлекеттік органдар күні бүгінге дейін тексере алмай отырғанын айтты. 

“Өздеріңізге белгілі еліміздің екінші қаласы – Алматы, экологиялық тұрғыда өте қолайсыз, сейсмикалық қауіпті аймаққа жатады. Бірақ, ол жағдайды тек табиғи факторға жауып қоятын болсақ, біз қатты қателесеміз. Қаланың эко-сейсми ахуалының күрделене түсуіне түйені түгімен жұтқан ірі компаниялар мен корпорацияларда өлшеусіз өз үлестерін қосуда. Соның бірі, һәм бірегейі, Алматы қаласындағы бүгінгі таңдағы ең ірі құрылыс компаниясы – "Qazaq stroy" ЖШС болып табылады”,- деді Абзал Құспан.

Депутат осы компания мен жергілікті барлық саладағы билік, құқық қорғау органдарының өзара ауыз жаласқан сыбайлас жемқорлық әрекеттері туралы оқиғалар тізбегін қысқаша баяндап берді. Оның айтуынша, 2020 жылы Алматы қаласы бойынша экология департаменті қала тұрғындарының ұжымдық арызы негізінде жүргізген тексеру нәтижесінде "Qazaq stroy" ЖШС құрылыс компаниясының қаланың қақ ортасында 3,6 га жерде құмды-қиыршықтас қоспасын (ПГС) еш рұқсат құжатсыз, заңсыз қазып алып, мемлекеттік "Нұрлы жер" бағдарламасы бойынша өзі салған 128 көпқабатты үйдің құрылысына пайдаланғанын анықтаған. Оған қоса, құрылыс қалдықтарын жинақтайтын үлкен қоқыс алаңын рұқсатсыз ұйымдастырған. Қала тұрғындары өз өміріне қауіптеніп, түрлі мемлекеттік органдарға, оның ішінде қалалық әкімдікке, прокуратураға, полицияға бірнеше рет арызданған. Бірақ еш нәтижеге жете алмаған. Республикалық деңгейде резонансқа айналған бұл заңбұзушылыққа жергілікті Экология департаменті ғана назар аударып, тексеру нәтижесінде 3,6 млрд.теңге көлеміндегі мемлекетке келтірілген шығынды анықтаған. 

“Алайда, 2020 жылдан бері осы резонансты іс төңірегінде сот даулары аяқталар емес. Күні бүгінге дейін заң бұзушы компания тексеру қорытындыларына негізсіз шағымданып, нәтижесінде мемлекет пайдасына шешілген, заңды күшіне енген 25 тен аса сот қаулылары мен шешімдері, оның ішінде Жоғарғы Соттың заңды күшіне енген 4 қаулысы бола тұра уәкілетті органның қызметтік құзыретке сай әрекеті еш негізсіз Әкімшілік рәсімдік-процестік кодекспен қайта қаралып, заң бұзушы компанияны жауапкершіліктен құтқаруға бағытталған астыртын әрекеттер орын алуда”,- деп баяндады мәжілісмен. 

Депутат атап өткендей, мемлекет пайдасына төленуі тиіс 3,6 млрд теңге залал әлі күнге дейін өндірілмеген. Негізі заңмен бекітілген жалпы орындау мерзімі - 2 ай. Бұл жағдайда 2 жылдан асқан шешімді Алматының мемлекеттік сот орындаушылары көрінеу орындамай, керісінше "Qazaq stroy" компаниясын жалған банкрот жасауға тырысып жатыр.

"Үш жылға созылған сот процестері кезінде назар аударуды қажет ететін аса маңызды жайттар орын алған. Атап айтқанда, осы іс бойынша сот процестерімен тікелей байланысты 560 000 АҚШ доллары көлеміндегі сыбайлас жемқорлық әрекеті орын алған. Алайда, тергеу огандарының қашанғы әдеті бойынша сол соманы "Qazaq stroy" мүддесі үшін алматылық судьяларға беремін деп алған прокурор Ерлепесов бұрын қызметінен кеткен болып алаяқтығы үшін сотталады да, ал прокуратура, сот және  іс жүзінде пара беруші "Qazaq stroy" қызметкерлері сүттен ақ, судан таза болып шығады. Оған қоса, табиғатқа зиян келтіру фактісі бойынша қозғалған қылмыстық істі 2020 жылдан бері Алматы қаласының полиция департаменті екі рет қысқартып, созбашылыққа салған. Алайда, Алматы қаласының тергеу сотында Экология департаментінің шағымы негізінде полицияның істі қысқарту туралы қаулысы қаралып, заңсыз деп танылған. Осы іске компанияның нақты қатысын дәлелдейтін жеткілікті дәйектер бола тұра жергілікті полиция департаменті істі тергеумен аяқтауға әлі де асығар емес. Мәселенің түйіні ретінде мына фотоға баршаңыздың назарыңызды аударғым келеді. "Qazaq stroy" ЖШС өзі қазып алған карьерден небәрі 20 метр қашықтықта 10 қабатты тұрғын үй салған. Ол үй еш кедергісіз пайдалануға берілген, қазірде ол үйде 1000-нан аса тұрғындар тіршілік кешуде", - дейді ол.

Абзал Құспан Алматы қаласының сейсмологиялық қаупі мен жауын-шашынның көп түсетін аймақ екендігін ескере отырып, бұл көпқабатты үйді салуға, оны пайдалануға рұқсат қаншалықты заңды берілгендігі жан-жақты тексерілуі керек деп санайды.

"Qazaq stroy" ЖШС-не қатысты бұл жағдайлар туралы менің атыма бір емес, бірнеше арыз-шағымдар түсті, мен өз тарапымнан Республикалық Бас Прокурор, Жоғарғы Сот, Әділет министріне хаттар жолдап, кейбірін бірінші басшыға өз қолыммен арнайы табыс еттім. Бірақ, Алматы қаласындағы жемқорлықтың сірескен сеңін бұл лауазым иелерінің ешқайсысы бұза алмады", - деп мәлімдеді мәжілісмен.

Депутат Сыбайлас жемқорлыққа қарсы іс-қимыл агенттігінің төрағасы Асхат Жұмағалиге негізсіз созбашылыққа салынған сот актілері, мемлекет пайдасына өндірілген 3,6 млрд теңгенің орындалуын 2 жылдан астам уақыт созбашылыққа салып келе жатқан мемлекеттік сот орындаушылары туралы хабарлауды сұрады.

“Алматы қаласы бойынша барлық билік тармақтарымен ауызжаласу фактілері, оның ішінде Алматы қалалық Антикор қызметкерлерінің осы компанияға тиесілі ТҮК-нен (ЖК) жеңілдетілген бағамен пәтерлер алу фактілері жайлы мәліметті өтінеді”- деп атап өтті өз баяндамасында. 

Депутат Құспан Қазақстанды ескі және жаңа деп екіге бөлгенін және жемқорлықтың ірісін ескі Қазақстанмен, Назарбаевтың отбасы мүшелерімен байланыстырылғанын айтты.

“Ал, Жаңа Қазақстанда жемқорлықсыз әділетті қоғам орнатамыз дедік. Ендеше үш жылға созылған, мемлекетке және халыққа қарсы мынадай жемқорлық әрекеттерге тосқауыл қою үшін міндетті түрде Президент немесе Президент әкімшілігінен пәрмен күтпей, белсенді әрекетке көшуге шақырамын Сізді. Әрі-беріден соң ол – Сіздің тікелей заңмен бекітілген қызметтік міндетіңіз! Олай болмаған жағдайда Президенттің әділетті Қазақстан бастамасы аяқсыз қалып, билік халықтың сенімінен біржола айырылатын болады", - дейді ол.
 

Талқылау