Теміртауда зейнеткерді ұрып-соққан жасөспірімдер үшін әкімнің орынбасары жазаланды
Қарағанды облысының әкімі Ермағанбет Бөлекпаев Теміртауда жасөспірімдердің қатысуымен болған резонанстық жағдайға пікір білдірді. Бұл туралы Stan.kz ақпарат агенттігі хабарлайды.
Коллаж Stan.kz
Облыс әкімінің айтуынша, орынбасары Әлібек Әлденей Қарағанды облысы бойынша кәмелетке толмағандардың істері және олардың құқықтарын қорғау жөніндегі комиссияның отырысын өткізеді.
"Теміртау қаласы әкімінің әлеуметтік мәселелер жөніндегі орынбасарына кәмелетке толмағандарға тиісінше бақылау жасамағаны үшін қатаң сөгіс жариялауды тапсырдым. Сондай-ақ жасөспірімдер оқыған білім беру мекемелері директорларының орынбасарлары тәртіптік жауапкершілікке тартылды. Біз жасөспірімдер агрессиясына сөзсіз алаңдаймыз және болашақта осындай оқыс оқиғаларды азайту бойынша қосымша шаралар әзірлеуге кірісеміз. Барлық кінәлілер қолданыстағы заңнама шеңберінде жауапкершілікке тартылады", – деді әкім.
Сондай-ақ полицияның оқиға бойынша тергеу жүргізіп жатқанын мәлімдеді.
"Ата-аналардан, педагогтардан балаларды тәрбиелеуге және олардың басқа адамдарға құрметпен қарауын, дұрыс құндылықтарды қалыптастыруға көбірек көңіл бөлуді сұраймын. Біз өз тарапымыздан жасөспірімдерді әлеуметтік қолдау мен алдын алу шараларын күшейту жұмыстарын жалғастырамыз", – деді әкім.
Айта кетейік, бұған дейін Теміртауда қарияның үйіне баса көктеп кіріп, соққыға жыққан жасөспірімдердің видеосы тарағанын жазған едік. Теміртауда түсірілген видеода 16-18 жас шамасындағы жігіттердің төсектен тұра алмай жатқан қарияны ұрып, бетінен теуіп жатқанын көруге болады. Сондай-ақ қарияға балағат сөздер айтып, бетіне түкірген. Зейнеткер қорғануға тырысқанымен одан сайын соққы алып жатқаны байқалады.
"Баланы тұз қосылған суға шомылдыру, омырауын сығу" сынды салттар қаншалықты дұрыс – Мамандар жауап берді
