Дәл қазіргі уақытта тойдың қарыштап дамып тұратын кезі еді. Асабалар той жүргізіп, әншілер ән айтып, би алаңы да бос тұрмайтын. Алайда карантиннің салдарынан тойханалар бос тұр. Бұл тек асаба, аспазшы, музыканттардың ғана емес тіпті шоу бизнесте жүрген әншілерге де кесірін тигізіп жатыр

Иә, қазақтың тойы бітпесін деп, үнемі той-думанның ортасында жүретін әншілерге бұл жыл оңай болмады. Той тоқтады. Ол аз десеңіз, бес жыл мораторий жариялау ұсынылды. Десе де, әр тойдан долларлап гонорар алатын әншілерге өздері емес, дәстүрлі әнші, педагог Рамазан Стамғазиев араша түсті. Егер мораторий қабылданса, тек тоймен жан бағып отырған әріптестеріне қиын болатынын айтады.

"Төтенше жағдайлар болып жатқан кездерде тойды уақытша тоқтата тұруға болады. Бірақ бес жылға емес. Бес жылға мораторий жариялап тойды тоқтатып тастау дегенге бәрі қарсы шығады. Ал енді той деген мәселені бұл енді тек қана тоймен жанын бағып жүрген тойсыз күн көре алмайтын әншілер үшін бұл өте қауіпті. Қауіпті болғанда да өз жанын бағар бірақ бес жыл бойы бала-шағаны асырау керек", - дейді дәстүрлі әнші Рамазан Стамғазиев.

Әншілікті кәсіп қылып, нәпақа тауып жүрген Серік Исахан той тоқтап қалса не істерін білмейтінін айтады.

"Қазақ өзі ежелден тойшыл қауым. Отыз күн ойын, қырық күн тойын жасады дейді. Менің жаным сүйіп істейтін ісім осы тойға барамын, тойдан ләззат аламын. Көп адамдар тойда бір-бірін көрісіп жатады, танысып жатады, араласып жатады. Сондықтан той халықтың қазынасы", - дейді әнші Серік Исахан.

Өзін шоумендердің патшасысанайтын Нұрбек асаба алдағы күніне алаңдайды, әйтсе де басқа жұмыс іздемепті.

"Қадыр-Мырза әлі атамыздың өзі айтып кеткен ғой «қазаққа тойсыз өткен өмір өмірге саналмайды» деп. Сол себепті тоймен өткізуіміз керекпіз деп ойлаймын. әзірге жиған тергенімізбен жәйлап өмір сүріп жатырмыз. Жұмыс қарағанда әзірге үмітпен күтіп жатырмын мен. Бұйыртса болады", - дейді асаба Нұбек Саламатов.

Ал, қоғам белсендісі даңғазалық пен дарақылығы көп тойды тыя тұруды жөн санайды. Егер, әншілер тойсыз күнін көре алмай жатса, басқа жұмыс істесін дейді.

"Олар ойлайды да тек қана мен әнші жеңіл-желпі ақша тапқысы келеді. Маңдай тері терлемей ақша тапқысы келеді. Адам тойдан да басқа неше түрлі жұмыс табамын деген адамға бар ғой толып жатыр.Той индустриясын тоқтата тұрған дұрыс деп ойлаймын. Әншілердің бір кбейнебаянды жазып алып сол клиппен бүкіл тойды айналдырып жүргенін сол тоже күлкің келеді. Жалпы тойды қадағалайтын комиссия ма, бірдеңе құрылу керек", - дейді қоғам белсендісі Жұмамұрат Шәмші.

Аталмыш жайтқа байланысты елордадағы көлік тасымалдаушылар қауымдастығының атқарушы директоры Сәкен Ханхожин жұмыссыз жүргендерге ұсыныс жасады.

"Бізден көптеген адамдар жұмыс сұрап келді. Олардың арасында әр түрлі мамандық иелері болды. Қазіргі таңда бізге жүргізушілер, операторлар қажет. Егер жұмыссыз қалған болсаңыз бізге жұмысқа келіңіз", - деді "Нұр-Сұлтан қ. Көлік тасымалдаушылар қауымдастығы" ЗТБ атқарушы директоры Сәкен Ханхожин.

Рамазан Стамғазиев те әншілердің тойды күтіп жата беруіне қарсы. Мәселен, әріптестерін өзі сияқты ұстаздық етіп, шәкірт тәрбиелеуге шақырды.

"Қазір мысалы үйде отырмау керек ендігі мәселе алдыңғы қатарлы ағалары, әпкелері сияқты педагогикамен жұмыс істесін. Жұмыс істесін кәдімгі профессионалды тек қана тойға барып түске дейін ұйықтап, түстен кейін ақша тауып сонымен ғана өмір сүру деген нәрсе ол уақытша екенін өздері де біледі ғой енді. Фундаментально дейді ғой сол өзінің оқыған профессиясымен қазір не көп қазір жұмыс жетеді қазір бала-бақшада, мектептерде, колледжерде маман керек", - деді әнші Рамазан Стамғазиев.

Талқылау