Шымкенттегі 7 баланың анасының өліміне кінәлі деген күйеуі 1,5 жылға ғана сотталды: Балаларының куәлігі жарамсыз деп танылды

Фото: Шолпан Ақмырзаның туыстарының архивінен

Шымкентте отбасылық зорлық-зомбылық құрбаны болған Шолпан Ақмырзаның өліміне қатысты істің нүктесі қойылды. Қылмыстық іс "өзін-өзі өлтіруге дейін жеткізу" бабы бойынша қозғалып, сот үкімімен әйелдің күйеуі 1,6 жылға ғана бас бостандығынан айрылды. Бұл туралы Stan.kz ақпарат агенттігі хабарлайды.

Қайғылы жағдай биыл 5 ақпанда қаладағы көпқабатты үйлердің бірінде болған. 42 жастағы келіншек үшінші қабаттағы пәтерден құлап, тіл тартпай кеткен. Анасының өліміне 2 және 4 жастағы балалары куә болған. Олар келіншекті терезеден 20 жыл отасқан күйеуі лақтырғанын айтқан екен. Алайда балалар кәмелет жасына толмағандықтан, сотта олардың сөзі куәлікке алынған жоқ. 

Фото: Stan.kz

"Дау әйелдің несие алғанынан шыққан екен. Оны ер адам байқаусызда телефонынан көріп қойып, жанжалдасқан. 7 баласының анасын балағаттап, кейін қол көтергенін мойындады. Бірақ әйел үшінші қабаттан құлағанда басқа бөлмеде болғанын айтты. Сотталушының жәбірленушіні терезеден лақтырғанына ешқандай дәлел жоқ. Сондықтан да іс "өзін-өзі өлітурге дейін жеткізу" бабымен қаралды. Сотталушы 1 жыл 6 ай мерзімді жазасы барынша төмен мекемеде өткізеді", – деді судья.

Алайда марқұмның қыздары үкіммен келіспейді. Олар аналарының 20 жыл бойы қорлық көріп келгенін айтады. Сөздерінше, жантүршігерлік жағдайға куә болған кішкентайлар анасын әкесі гантельмен ұрып, кейін терезеден лақтырып жібергенін айтқан.

Фото: Stan.kz 

"Анасызды өлтірген адамға жазаның мұнша жеңіл болғаны жанымызға батып тұр. Әкеміз жасаған осы әрекеті үшін бізден тек соңғы сөзінде кешірім сұрады. Біз оны кешірмейміз. Анамыз өмірде бір жақсылық көрмей кетті. Бізді асыраймын деп күннің ыстығы, даланың суығына қарамай базарда тұрып нәпақа тапты. Қала берді әкеміздің адам төзбес әрекетіне шыдап келді. Анам өлгісі келсе, оқиғадан үш күн бұрын ғана несиені төлемейтін еді ғой? Қазір анамыздың несиесі бізге, ал сатып алған жері әкеміздің атына өтті", – дейді жәбірленуші мен сотталушының қыздары.

Марқұм Шолпан Ақмырзаның артында 7 баласы қалды. Оның ең үлкені – 22 жаста, ал кішісі – 2 жаста. Марқұм мен сотталушы 16 жыл заңды некеде тұрған. Тек 2020 жылы ресми түрде ажырасқан. Көп ұзамай қайта қосылған, бірақ некені тіркетпеген. Сол аралықта тағы екі бала дүниеге келген.

Еске салсақ, 5 ақпан күні Шымкенттегі көпқабатты үйлердің бірінің ауласынан 42 жастағы әйелдің мәйіті табылғанын жазған едік. Көп ұзамай балаларының көзінше әйелін өлтірген деген күдікпен марқұмның күйеуі ұсталған болатын.