Пермь университетіндегі атыс кезінде дәріс өтуін тоқтатпаған профессорды жұмысынан шеттетті
Пермь мемлекеттік университетінің профессоры Олег Сыромятников университетте атыс басталған сәтте дәріс өтуін тоқтатпаған топқа сабақ беруден шеттетілді, деп хабарлайды Stan.kz ақпарат агенттігі 59.RU сайтына сілтеме жасап.
"Бұл шешім 20 қыркүйектен кейін студенттер мен университет қызметкерлеріне консультациялар жүргізген ТЖМ психологтарының ұсыныстары негізінде қабылданды", – деп мәлімдеді университеттің баспасөз қызметі.
Университет сонымен қатар Олег Сыромятниковтың "бұрынғыдай Пермь мемлекеттік ұлттық зерттеу университетінде жұмысын жалғастыратынын" атап өтті.
Еске салсақ, Пермь мемлекеттік университетінің бірінші курс студенті өзі оқитын білім ордасына қару әкеліп, адамдарға оқ жаудырған. Салдарынан алты адам көз жұмып (бұған дейін 8 адамның қаза болғаны айтылған еді), тағы 24-і жарақат алды.
- "Бұл сабақ қой": Пермь университетіне жасалған қарулы шабуыл кезінде мұғалім дәрісін тоқтатпаған
- Университеттегі қанды оқиға туралы жиын өткен: Пермь тергеу комитетінің басшысы өз-өзіне қол жұмсады
- Пермь университетінде көз жұмғандардың есімдері мен фотосы жарияланды
"Дожд" арнасының мәліметінше, университет студенттері атыс кезінде профессор Олег Сыромятников орыс әдебиетінің тарихы бойынша дәрісті тоқтатпағанын айтқан. Төнген қауіпке қарамастан оқытушы сабағын жалғастыра берген. Сабақты тек студенттерді эвакуациялауға келген ОМОН қызметкерлері ғана үзген.
Кейінірек Сыромятников аудиторияның есігін "қару өтпестей етіп" бекітіп қойғанын түсіндірді. Ол сондай-ақ оның әрекеті дүрбелеңнің алдын алуға көмектескенін айтқан.