“Келін қылып алатын қыз”: Желіде қазақша ән айтқан португалиялық ару қазақстандықтарды тәнті етті
Фото: Лара Алейшу парақшасынан
Желіде қазақша ән шырқаған португалиялық қыз көпті сүйсіндірді. Өнері басқаларға ұнағаны соншалық, оған көпшілік “қазаққа келін бол” деп ұсыныстар қалдырған. 24 жастағы Лара Алейшу қазақ музыкасы туралы алғаш Димаш Құдайбергенді тыңдаған кезде білген. Айтуынша, содан бері өзге де қазақ әншілерінің талантына тәнті болып, түрлі каверлер түсіріп желіге бөлісе бастаған. Лара Stan.kz тілшісіне қазақ өнері мен елімізден алған әсері туралы айтып берді.
Лара Алейшу бизнес менеджменті мамандығы бойынша оқыған. Алайда қазір шығармашылықпен айналысып жүр екен. Әсіресе музыкаға ден қойып, вокал курстарына баратынын жеткізді. Фотограф болып та жұмыс істейді.
“Қазақ тілінде ән айтуды 2019 жылы бастадым. Ол кезде YouTube желісінен Димаш Құдайбергеннің ән айтқанын естіп қалдым. Дауысы бірден баурап алды. Кейін оның қазақша әндерін орындауды үйрендім. Алғаш Димаштың “Ұмытылмас күн” атты әніне кавер жаздым. Кейін қазақша басқа да әндерді тыңдай бастадым. Неғұрлым көп тыңдаған сайын соғұрлым ғашық бола бастадым. Осылайша қазақ мәдениетімен тереңірек таныса түстім. Қазақтар – өте-өте талантты халық”, – деді бойжеткен.
Лара Қазақстанға үш рет келіп, сахнаға шығып, өнер көрсетіп үлгерген.
“2019 жылы мен “Нұр-Сұлтан дауысы” фестиваліне қатысып, Португалияның атынан қазақ және португал тілдерінде ән айтып шықтым. 2023 жылы “Тұран дауысы” байқауында өнер көрсетіп, талантты әнші Қазыбек Құрайышпен бірге ән шырқадым. Ал биыл, бір ай бұрын, тағы да Қазақстанға барып, сахнаға қонақ ретінде қайта шықтым. Қазыбекпен бірге және жеке қазақша ән орындадым.
Қазақстанда үш рет болсам да, әр барған сайын елдің табиғаты мен мәдениетіне қайран қаламын. Қазақ музыкасы – өте әсем, ал халықтың қолдауы мені қатты қуантады. Қазақстанда мені ең қатты таңғалдырған нәрсе – дарындылар өте көп. Әншілердің вокалдық шеберлігі, әнге салған жан-дүниесі, ұлттық аспаптар мен әуендерді заманауи бағытпен шебер үйлестіре білуі – бәрі маған шабыт береді. Әсіресе Димаш Құдайберген, Қазыбек Құрайыш, Садраддин, IL’HAN, Жарқынай Ханайым, Мөлдір Әуелбекова, Сәкен Майғазиев сынды әртістерді сүйіп тыңдаймын”, – деп қосты ол.
Sou muito fã das músicas do Kazybek Kuraiysh 🎶
♬ som original - Lara Aleixo
Португалиялық ару қазақтардың қонақжайлығын да сөз етті.
“Қазақ халқының мейірімділігі мен қонақжайлығы жүрегіме жылы әсерін қалдырды. Елдің табиғаты мен сәулеті де ерекше. Көркем табиғаттан бастап, тарихи ескерткіштерге дейін әрбір бөлшегінде терең рух пен ұлттық болмыс бар. Қазақстан – адамды бейжай қалдырмайтын ел. Мен әзірге қазақ тілінде сөйлей алмаймын, бірақ оны үйренгім келеді. Қазірдің өзінде біраз сөздерді білемін, әрі қарай тереңірек меңгеруге тырысамын.
Қазақстанға жиі келіп тұрғым келеді. Қазақ тілінде авторлық әндер жазып шығарсам деген де ниетім бар. Сондай-ақ маған шабыт сыйлайтын қазақ әртістерімен бірлесіп жұмыс істеуді армандаймын. Бұл ел менің жүрегімді музыка арқылы ғана емес, жалпы жан-дүниеcімен баурап алды”, – деп қорытты ол.
Лараның желіге қазақша ән айтып салған видеолары 1 миллионға жуық қаралым жинаған. Қазақстандықтар оған пікірде жылы тілектерін жаудырды.
“Келін қылып алатын қыз екен”, “Басқа елдің азаматы тырысып қазақша айтып жатыр. Қандай керемет!”, “Сені тыңдаудан шаршамаймын, айналайын!”, “Дауысы керемет”, “Қазақ еліне осындай бір келін керек. Ұсыныс жасасам келісесің бе?”, “Өнері өрге жүзсін қазақтың сары қызы”, – деп жазды жұрт.
@laraaleixo Que canção bonita…🥹🤍
♬ som original - Lara Aleixo
Әкімдік қаладағы ескі брусчаткалардың мұқтаж отбасыға берілгенін айтты: Алайда Боқаев төсеуіштің жеке қолға сатылып жатқанын түсіріп алған (видео)
