Қылмыстық іс материалдары бойынша, оқиға былтырғы қазан айында қалалық көлік жуу орындарының бірінде болған. Жүргізуші куәлігінен айырылған 32 жастағы сотталушы мас күйде көлік тізгіндеп, көлік жуушы әйелді соғып кетті. Қайғылы жағдай ер адам клиенттің көлігін жууға апаруға тырысқан кезде болды. Салдарынан ауруханада әйелдің оң аяғын тізеден жоғары кесіп, сол аяғына операция жасады.

Сот отырысы барысында сотталушы сол күні клиент көлік жуатын орынға кіре алмағанын және көлік жуушы одан көлікті қоюды сұрағанын айтты. Ер адамның айтуынша, ол тежегіш пен газ педальдарын шатастырған. Кейіннен оның рульге отыруға құқығы жоқ екені анықталды. 2016 жылы ол мас күйінде көлік айдағаны үшін алты жылға жүргізуші куәлігінен айырылған.

Сотта ер адам өз кінәсін толық мойындады, өкініп, оған ең аз жазаны тағайындауды өтінді.

"Сотталушы "Көлік құралдарын жүргізу құқығынан айырылған және абайсызда адам денсаулығына ауыр зиян келтіруге әкеп соққан мас күйдегі адамның көлік құралын басқаруы" бабы бойынша қылмыстық құқық бұзушылық жасағаны үшін кінәлі деп танылды. Оған 5 жыл 4 айға бас бостандығынан айыру жазасы тағайындалды. Заң бойынша бұл осы бап бойынша жеңілдететін және ауырлататын мән-жайлар болмаған кезде тағайындалуы мүмкін ең ұзақ мерзім", - деп түсіндірді Павлодар қылмыстық сотының судьясы Жанар Тұрлыбаева.

Сондай-ақ, сот ер адамды өмір бойы көлік жүргізу құқығынан айырды. Ол жазасын қауіпсіздігі орташа қылмыстық-атқару жүйесі мекемесінде өтейді.

Үкім заңды күшіне енген жоқ.

Еске сала кетсек, өткен жылдың 31 қазан күні Павлодардағы Бейбітшілік көшесінде орналасқан көлік жуу орталығының ғимаратында мас күйде болған орталық қызметкері көлікті алға жылжытпақ болып, орталықтың тағы бір қызметкерін – 31 жастағы әйелді қабырғаға жанжыған болатын. Салдарынан ол облыстық ауруханаға жеткізіліп, бір аяғы ампутацияланды.

Талқылау