Қазақстанның үш қаласында 13 заңсыз мал сою цехы анықталды
Елімізде мал ұрлығының алдын алу және қылмыстарды ашу мақсатында Ішкі істер министрлігі жедел-профилактикалық іс-шара өткізді. Бұл туралы Stan.kz ақпарат агенттігі хабарлайды.
Фото: Видеодан скрин
11-31 наурыз аралығында кезекті рет республикалық кең ауқымды "Мал ұрысы" жедел-профилактикалық іс-шарасы өткізілді. 21 күндік операция барысында 54 мыңнан астам мал тасымалдаған автокөлік, 17 мыңнан астам сатып алу орындары, 28,5 мың шаруа қожалығы және фермалар тексерілді.
Астана, Алматы және Шымкент қалаларында 13 заңсыз мал сою цехтары анықталды. Полиция мал ұрлығына қатысты 131 адамды анықтады. Сонымен қатар 26 қылмыстық топтың әрекетіне тосқауыл қойылды. Жалпы мал ұрлығының 135 дерегі ашылып, 580-нен астам жануар иелеріне қайтарылды”, – деді Ішкі істер министрлігі криминалдық полиция департаментінің бастығы Қанат Нұрмағамбетов.
Алматы облысында мал ұрыларының екі тобы ұсталды. Олардың бірі жергілікті тұрғындардан 16 ірі қара малды ұрлап, 11 қылмыс жасаған.
Ал екінші қылмыстық топ 9 ұрлық жасап, 103 бас ұсақ малды қолды еткен.
Сонымен қатар Жамбыл облысында жергілікті тұрғындардан 28 жылқыны ұрлап әкеткен үш адамнан тұратын топ ұсталды. Уақытылы қабылданған шаралардың нәтижесінде 2025 жылы мал ұрлығы 26% төмендеді.
Айта кетейік, бұған дейін Астаналық кәсіпкер заңсыз цех ашып, тартылған етке тұяқ қосқаны туралы жазған едік.