Қазақстанда отшашуды сатуға тыйым салу ұсынылды
Елімізде пиротехниканы бейбіт тұрғындарға сатуға толық тыйым салуға шақырған петиция пайда болды. Бастаманың авторы отшашулар қоршаған ортаға зиян келтіріп қана қоймай, үлкен қауіп төндіретінін айтқан. Бұл туралы Stan.kz ақпарат агенттігі хабарлайды.
Фото: pixabay.com
Қазақстандықтың пікірінше, адамдар отшашуды іске қосу кезінде сақтық шараларына немқұрайлы қарайды.
"Отшашуды жаппай іске қосу қысқа мерзімде ауа сапасына өте теріс әсер ететін көптеген ластаушы заттардың шығарылуына әкеледі. Одан бөлек, құстар мен жануарларды қорқытады. Жаңа жыл қарсаңында көбіне күтпеген жерде жүздеген құстар өледі. Жарылыстан қорқып, қашқан ит, мысықтар жоғалып кетуі немесе көлік дөңгелектерінің астына түсуі мүмкін. Егде жастағы және жүрегі әлсіз адамдар да жарылыс кезінде қатты дыбыстан инфаркт алуы мүмкін", – деді автор.
Сонымен қатар петицияны ұсынушылар отшашудың ашық терезелер мен балкондарға түсіп, бірнеше рет өрт тудырғанын атап өтті.
"Балалар терезеден өтіп бара жатқан адамдардың аяғының астына петардалар лақтырады. Содан кейін қашып кетеді. Ал өтіп бара жатқан адам инфаркт алуы мүмкін немесе құлап, күйік немесе басқа да жарақат алуы мүмкін", – делінген жазбада.