Қазақстанда ана капиталы бағдарламасы енгізілмейтін болды
Еңбек және халықты әлеуметтік қорғау министрлігі Қазақстанда ана капиталы бағдарламасы енгізілмейтінін мәлімдеді. Бұл туралы Stan.kz ақпарат агенттігі хабарлайды.
Министрлік өкілі бұл шара бала туу көрсеткішін арттыру үшін тиімсіз екенін мәлімдеді. Себебі басқа шаралар бар дейді. Бала күтімі бойынша төлемдер енді бір жылға емес, бір жарым жылға төленеді. Келесі жылдан бастап балалар ұлттық қордан инвестициялық кіріс алады. Ата-аналар да балаларының оқуына ақша жинауға мүмкіндік алады.
Шымкенттік Әсел Зайырованың төрт баласы бар, кішісі небәрі 3 айлық. Ол уақыттың созылғаны оған көмек болғанын айтады.
"Біз бала күтімі бойынша 1,5 жасқа дейін жәрдемақы аламыз. Бір жарым жылға дейін декреттік демалыста уақытымды бөліп, баламды қарауға мүмкіндігім болғанына өте қуаныштымын. Енді бір жарым жасқа дейін баланы бағуға мүмкіндік бар", – деді Әсел Зайырова.
Қоғам белсенділері мемлекет тарапынан ата-ананы қолдауға, елдегі бала туу көрсеткішін ынталандыруға қыруар қаржы бөлініп жатқанын айтады. Себебі бүгінгі күні білім мен дәрі-дәрмекке ақы төлеудің қажеті жоқ.
"Елімізде медициналық қызмет тегін көрсетіледі. Әйел жұмыс істемесе, мүмкіндік жоқ, кез келген жағдайда бала туу мен асырау медициналық сақтандыру қорына кіреді", – дейді әйелдер істері және отбасылық-демографиялық саясат жөніндегі ұлттық комиссияның мүшесі Гүлнәр Омарова.
Келесі жылдан бастап 18 жасқа толмаған әрбір қазақстандықтың шотына ақша аударылады. "Ұлттық қор – балаларға" бағдарламасы бойынша бала кәмелетке толғанша ақша жинақталады.
"Бұл қаражатты бала 18 жасқа толған кезде алуға болады және оны тұрғын үй жағдайын жақсартуға, білімге құя алады", – деді қаржы министрлігінің бюджеттік несиелеу бойынша өзара іс-қимыл департаментінің директоры Айбол Арғынғазинов.
Сонымен қатар елімізде "Келешек" бірыңғай ерікті жинақ жүйесі пайда болады. Ата-аналар өз баласына шот ашып, оған мемлекет 60 АЕК көлемінде бастапқы капитал аударады. Ата-аналардың ай сайынғы жарналарымен және инвестициялық кіріспен бірге 18 жасқа дейін жоғары оқу орындарына жұмсалатын сома жиналуы мүмкін.
2022 жылы Қазақстанда 403 мыңнан астам бала дүниеге келген. Үкімет бірқатар әлеуметтік бағдарламалар енгізілгеннен кейін бұл көрсеткіш жоғары болады деп үміттенеді.