Карина Мамаш бұрынғы күйеуінің ағасын сотқа беретінін мәлімдеді

Видеодан скрин

Әйелін соққыға жыққаны үшін сотталған дипломат Сәкен Мамаштың бұрынғы жұбайы Карина Мамаш бұрынғы күйеуінің туыстарын сотқа беретінін мәлімдеді. Бұл туралы Stan.kz ақпарат агенттігі хабарлайды. 

Карина Мамаш экс-күйеуінің туыстарын өзіне жала жапты деп айыптап, сонымен қатар әлеуметтік желіде оның әйелдің және балаларының суреттерін жариялап жүргеніне шағымданды. 

TikTok желіcінде дипломаттың ағасы Нұржан Мамаш Карина Мамашқа қатысты “жалған айыптау” фактісі бойынша арыз жазғысы келгенін, алайда Сәкеннің арыздануға мүмкіндік бермегенін мәлімдеген. 

"Сәкен “менің балаларының анасы” деп арыз жазуға рұқсат бермеді", – деп жазды Нұржан Мамаш.

Фото: instagram/karina.gosman

"Құрметті Нұржан Мамаш, менің атыма бағытталған қорлау мен жала жабуды қамтитын пікірлеріңіз жай ғана хейт емес, заң бұзушылық болып табылады. Барлық материалдар тіркеліп жатыр, және егер бұл жалғаса берсе, мен оларды тиісті органдарға тапсыруға мәжбүр боламын", – деп жазды әйел.

Сонымен қатар әйел бұрынғы күйеуінің туыстарынан өз келісімінсіз Карина мен балалардың суреттерін жарияламауды сұрады. 

"Сіздің жалаға толы пікірлеріңіз жағдайды одан әрі ушықтырып, заң бұзушылықтарды көбейтеді. Әрбір фото мен әрбір пост тіркелуде. Егер сіз өз "шығармашылығыңызды" жалғастырғыңыз келсе, оны әлеуметтік желілерде емес, сотта көрсетуге дайын болыңыз", – деді Карина Мамаш. 

Еске салсақ, бұған дейін Қазақстанның БАӘ-дегі елшілігінің қызметкері, дипломат Сәкен Мамаш әйелін азаптағаны үшін 6 жылға сотталған еді. Дипломаттың әйелі күйеуінен 10 жылдан бері зәбір көріп келе жатқанын айтып, көмек сұраған еді.