Қарағанды тұрғындары арасында "маньяк" туралы хабарлама тарап, жұртты дүрліктірді
Қарағанды тұрғындары арасында маньяк туралы хабарлама тарап, жұртты дүрлігіп жатыр. Әлеуметтік желі мен мессенджерлерде бір-біріне бұл ақпаратты жолдап жатқан халық қатты алаңдаулы. Бұл туралы Stan.kz ақпарат агенттігі хабарлайды.
Фото: multi-admin.ru
Хабарламада белгісіз жас әрі келбетті ер адамның қыз-келіншектерді алдап, сеніміне кіріп, шабуыл жасайтыны айтылған. Ол кейбіріне сөмкесін көтерісіп жіберуді ұсынса, енді бірін аңдып жүріп шабуылдайды екен.
"Бұл маньяк – жас әрі сымбатты жігіт. Сенімге кіреді. Жаяу жүрмеңіздер", – делінген бір хабарламада.
Тағы бір деректе оның студент қызды өлтіріп үлгергені, сондықтан қалада полицияның күшейтілген патрулі жүріп жатқаны жазылған.
Алайда бұл ақпаратқа Қарағанды облысы полиция департаментінің баспасөз қызметі жауап беріп, мұның жалған екенін мәлімдеді.
"Қарағанды облысы тұрғындары арасында қалада маньяк пайда болды деген жалған ақпарат мессенджерлерде тарап жатыр. Бұл ақпарат шындыққа жанаспайды. Қарағанды облысы полиция департаменті жалған ақпарат тарату, соның ішінде мессенджерлер мен әлеуметтік желілер арқылы жалған мәлімет тарату – Қазақстан Республикасының заңнамасына сәйкес қылмыстық жауапкершілікке әкелетінін ескертеді", – делінген полиция мәлімдемесінде.
Полиция тұрғындарды дүрлігуге жол бермей, сабыр сақтап, тек ресми ақпаратқа сенуге шақырды.
Айта кетейік, бұған дейін Қарағандыда Ассамблея референдумына қатысты жалған ақпарат таратқан екі тұрғын ұсталған еді. Бұл іс бойынша сараптамалар тағайындалған.
Еске салайық, Жамбыл облысында мессенджерлерде "Таразды балға ұстаған маньяк кезіп жүр" деген ақпарат тараған еді. Халық арасында үрей тудырған хабарламадан соң құзырлы орган мәлімдеме жасады. Департамент қазіргі уақытта күдіктіні анықтау және ұстау үшін қажетті тергеу-жедел шаралардың толық кешені жүргізіліп жатқанын айтты. Тергеу барысы полиция департаменті басшылығының бақылауында.