Қаңтар оқиғасы: Алматыда "Magnum" супермаркетін тонаған азамат шығынды өтеген соң, қамаудан босатылды
ҚР Ішкі істер министрлігінің тергеу департаментінің бастығы Санжар Әділов өткен аптада қаңтар оқиғасы бойынша 12 күдікті қамаудан босатылғанын айтты, деп хабарлайды Stan.kz ақпарат агенттігі.
"Сотқа жолданған істер бойынша жәбірленушілерге сомасы шамамен 100 млн теңге болатын зардаптың орны толтырылғанын атап өткім келеді. Бұл полиция қызметкерлерінің ұрланған мүлікті анықтауы және алып қоюы, сондай-ақ айыпталушылардың сотқа дейінгі тергеп-тексеру, оның ішінде сот тергеуі кезеңінде зардаптың орнын толтырғаны нәтижесінде қамтамасыз етілді", - деді Санжар Әділов сейсенбі күні өткен брифингте.
Әділовтің айтуынша, өткен аптада 12 күдікті қамаудан босатылған.
- Қасіретті қаңтардағы Алматыдағы тонаушылық: 40-тан астам сотталушы жеңіл жазамен құтылды
- "Немересін жетектеген әжей де болды": Тәртіпсіздіктер кезінде дүкендер мен сауда үйлерін тонағандар жайлы жаңа деректер шықты
- "Үтік пен еттартқыш ұрладым": Алматыдағы тәртіпсіздіктер кезінде дүкендерді тонаған 16 адам қамаудан босатылды
"Бүгінгі таңда ішкі істер органдарының істері бойынша барлығы 333 күдікті осы негіздер бойынша күзетпен ұстаудан босатылды. Олардың ішінде 96 адамды бұлтартпау шарасы үйқамаққа ауыстырылды. 78 адам кепіл арқылы, 67 адам ешқайда кетпеу және дұрыс мінез-құлық туралы қолхат арқылы және 11 адам жеке кепілгерлік арқылы бұлтартпау шарасын өзгертуге мүмкіндік алды. Одан басқа соттардың үкімдері бойынша 81 сотталушы қамаудан босатылды", - деді ол.
ІІМ өкілі сонымен қоса Алматыда "Magnum" супермаркетінен азық-түлікті ұрлаған бір күдіктінің де босатылғанын атап өтті.
"Тергеу барысында күдікті толығымен материалдық залалдың орнын толтырды. Соттың үкімімен ол кінәлі деп танылды. Бірақ жәбірленуші тараптан талаптардың болмауы ескеріліп, ол босатылды, дегенмен оған екі жылға бас бостандығын шектеу түрінде жаза қолданылды", - деді тергеу департаментінің бастығы.
