"Хиджаб киіп келуге рұқсат берген жоқ": Жоғарғы сот мектепке орамалмен келуге қатысты тыйымның алып тасталмағанын мәлімдеді

Жоғарғы сот мектепке хиджабпен баруды заңды деп танымағанын мәлімдеді. Олар тек оқушының мектепке бару құқығына қатысты шешім шығарғанын айтты. Бұл туралы Stan.kz ақпарат агенттігі хабарлайды. 

Фото: Pixabay.com

Көпшілік Жоғарғы соттың хиджаб кигендерді мектепке кіргізбеуге қатысты шешімін қате түсінген. Оны желідегілер мектепке орамал тағып баруға болады деп түсінген.  

“Істі қарау аясында Жоғарғы Соттың әкімшілік істер жөніндегі сот алқасы білім беру мекемесінде орамал тағудың заңдылығы жөніндегі мәселені талқылауға араласпаған. Кассациялық саты мектептің оқушыны сабаққа жібермеуін заңсыз деп таныды, өйткені білім алу құқығы – Қазақстан азаматтарының негізгі конституциялық құқықтарының бірі. Сонымен қатар бейінді министрлікте орта білім беру ұйымдары үшін міндетті мектеп формасына қойылатын талаптарды бекіту жөніндегі өкілеттіктер бар. Министрдің тиісті бұйрығы заңсыз деп танылмаған және күші жойылмаған”, – деп түсіндірді Жоғарғы соттың баспасөз қызметі.

• "Хиджаб – қыздарды сексуализациялау": Діни киімге қарсы петиция авторы қыздардың орамал жамылуына не үшін қарсы екенін айтты

• “Мұсылман еркектер "төсектес болайық" деп маза бермеді”: Қазақстандық қыздар хиджабын не себепті шешкендерін айтып берді

Ведомоство ата-аналар мектеп жарғысы мен мектеп формасына қойылатын талаптарды сақтау керегін атап өтті. 

“Ата-аналардың балаларды тәрбиелеу мен білім беру, олардың құқықтары мен мүдделерін қорғау жөніндегі өздеріне алған және заңда белгіленген, оның ішінде әкімшілік құқық бұзушылық туралы кодексте көзделген міндеттерді орындамауы жауапкершілікке әкеп соғады”, – деп мәлімдеді Жоғарғы сот.

Еске салсақ, бұған дейін Жоғарғы сот Қазақстанда хиджаб киетіндерді мектепке кіргізбеу заңсыз деп тапқаны айтылды.