Есеп комитеті "ҚазМұнайГаз" жұмысындағы заң бұзушылықтарды анықтады
Республикалық бюджеттің атқарылуын бақылау жөніндегі есеп комитеті "ҚазМұнайГаз" компаниясының жұмысындағы келеңсіздіктерді анықтады, деп хабарлайды Stan.kz ақпарат агенттігі ведомствоның баспасөз қызметіне сілтеме жасап.
2021 жылдың мамыр айында "ҚазМұнайГаз" ҰК" АҚ және оның жекелеген ведомстволық бағыныстағы ұйымдарының активтерін басқару тиімділігіне аудит жүргізілді.
Аудит барысында 16 сағат көлемінде жұмыс уақытына ақы төлеуді есепке ала отырып, бірнеше басшы лауазымдарды бір уақытта біріктіруге мүмкіндік беретін еңбек заңнамасының кемшіліктері анықталғаны атап өтілді.
"Қашықтан жұмыс істейтін қызметкерлер үшін белгіленген жұмыс уақытының белгіленген есебі болмаған жағдайда басқарма төрағасының орынбасары қызметі еншілес ұйымның бас директоры лауазымымен біріктірілді", - делінген хабарламада.
Сондай-ақ, "Нысандарды салу серіктестігі" корпоративтік қоры Түркістан облысы бойынша амфитеатр құрылысына бөлінген 307 миллион 938 мың теңге үнемделген қаржыны қайтармағаны анықталды.
Анықталғандай, сотқа дейінгі талап арыздан кейін корпоративтік қор "ҚазМұнайГаздың" есеп айырысу шотына көрсетілген ақша сомасын қайтарған.