Премьер-министр Олжас Бектенов дауыс беріп үлгерді. Ол Астанадағы оқушылар сарайында орналасқан №62 сайлау учаскесіне келді. Одан соң Ерлан Қариннің Ұлттық кітапханадағы №164 сайлау учаскесінде дауыс бергені белгілі болды. Энергетика министрі Алмасадам Сәтқалиев те таңдауын жасады.

Ал Алматыда қала әкімі Досаев әйелімен бірге №48 мектеп-лицейінде сайлау учаскесінде дауыс берген соң фотоға түскен.

Дауыс беру бюллетенінде мемлекеттік және орыс тілдерінде "Сіз Қазақстанда атом электр станциясының салынуын қолдайсыз ба?" деген сұрақ қойылған. Ал сайлаушы"Иә, келісемін" немесе "Жоқ, келіспеймін" деп жауап бере алады.

Дауыс беру кешкі сағат 20:00-ге дейін жалғасады. Дауыс беру тізіміне 12,3 миллионға жуық қазақстандық енгізілген. Референдумға қойылған мәселе бойынша шешiм оның оң шешiмiне азаматтардың жартысынан астамы дауыс берсе, қабылданды деп есептеледi.

Референдумға 30 шет мемлекет пен төрт халықаралық ұйымның (Тәуелсіз Мемлекеттер Достастығы, Шанхай ынтымақтастық ұйымы, Түркі мемлекеттері ұйымы, Азиядағы өзара іс-қимыл және сенім шаралары жөніндегі кеңес) атынан 177 байқаушы қатысады.

Дауыс беру барысын 14 мемлекеттің орталық сайлау органдарының өкілдері, соның ішінде Әзірбайжан, Беларусь, Тәжікстан және Өзбекстан орталық сайлау органдарының төрағалары да бақылап отыр.

Сыртқы істер министрлігі 37 елден 200 шетелдік журналистерді аккредиттеді, олар да республикалық референдумды бақылап, жариялайды.

Елімізде барлығы 10 323 сайлау учаскесі жұмыс істейді, оның ішінде 59 елде шетелдік мекемелерде ашылған 74 сайлау учаскесі бар. Референдум нәтижелері дауыс беру күнінен бастап жеті күннен кешіктірілмей бұқаралық ақпарат құралдарында жарияланады.

Талқылау