Cу тасқынынан зардап шеккен 61 мыңнан астам қазақстандық үйлеріне оралды
Қазақстанда cу тасқынынан зардап шегіп, эвакуацияланған 61 мыңнан астам адам үйлеріне оралды. Бұл туралы Stan.kz ақпарат агенттігі хабарлайды.
Фото: ТЖМ
Төтенше жағдайлар министрлігінің баспасөз қызметі басым бөлігі үйлеріне кетіп жатқандарын мәлімдеді.
"61 155 адам үйлеріне оралды. 5443 адам эвакуациялау орталықтарында қалды", – делінген хабарламада.
Су тасқыны басталғалы бері 21,6 миллион текше метрден астам еріген су сорылған.
"11 317 тұрғын үй мен 3 573 аула аумағынан су сорылды. 21,6 миллион текше метрден астам су сорылып, 7,9 миллион қап пен 1,5 миллион тонна инертті материал төселді", – делінген хабарламада.
Еске салсақ, су тасқынынан зардап шеккен Құлсары тұрғындары Жылыой аудандық әкімдігінің алдына түнеп шыққан еді. Олар әкімдіктің үйдің шаршы метріне 200-240 мың теңгеден беріледі деген талабына келіспей, шаршы метріне 400 мың теңгеден есептелуін талап етті. Талап орындалмаса, Теңізге баратын жолды жабуға ниетті.