Блогер Жанабыловтар 7 жылға дейін сотталуы мүмкін – адвокат

Фото: instagram.com/zhanabylov_e

Астанада танымал блогерлерге қатысты іс ушыға түсті. Ерболат Жанабылов пен Эльмира Төлегеноваға қатысты жаңа қылмыстық іс қозғалды. Бұл туралы Stan.kz ақпарат агенттігі хабарлайды.

Отбасының адвокаты Жасұлан Рахымғалиевтің айтуынша, ерлі-зайыптының әрекеттері Қылмыстық кодекстің 214-бабының 2-бөлігі және 218-бабының 2-бөлігі бойынша сараланған. Бұл заңсыз кәсіпкерлік қызметпен байланысты.

“Біз белгілі бір деңгейде қорғау жүргіздік, соның нәтижесінде сотқа дейінгі тергеп-тексеру органы тағы бір, неғұрлым ауыр бапты қозғау қажет деген қорытындыға келді. Қазір Жанабыловтарға ақшалай қаражатты заңдастыру, яғни жылыстату фактісі бойынша айып тағылып отыр. Бұдан бөлек, бүгін іс материалдарында прокурордың талабы пайда болғанын білдік. Яғни ол мемлекет мүддесі үшін қарапайым азаматтардан жиналған қаражатты өндіріп алуды талап етуде. Прокурордың пікірінше, бүгіннен бастап бұл қаражат мемлекеттік қаражат болып саналады. Бұл жағдайдағы ең қорқыныштысы әрі қауіптісі – қазіргі таңда Жанабыловтарға қатысты бұлтартпау шарасы таңдалып жатыр. Оның қандай болатыны әзірге белгісіз”, – деп атап өтті адвокат.

Сондай-ақ ол қылмыстық жолмен алынған ақша мен өзге де мүлікті заңдастыру (жылыстату) бабы бойынша 7 жылға дейін бас бостандығынан айыру жазасы қарастырылғанын қосты.

Айта кетейік, былтыр 18-21 тамыз аралығында Жанәбіловтер автокөлік ұтыс ойынын жариялағанын жазған едік. Жазылушылар тікелей эфирді күтті, алайда оның орнына 30 мың теңгелік ақылы оқу курсының сілтемесін алған. Ұтысқа қатысу үшін курсты сатып алу міндеттелген. Бұл әрекеттер әлеуметтік желі қолданушыларының жаппай наразылығын тудырып, мемлекеттік органдарға шағымдануына себеп болды. Туризм және спорт министрлігі лотерея өткізу мен билет таратуға тек ресми ұйымдастырушылардың ғана құқығы бар екенін еске салды. Осыдан кейін блогерлерге қатысты заңнаманы бұзу деректері бойынша істер қозғалған еді.