"Балалардың спортпен айналысуына тыйым салынды": Спорт министрлігі қанша жастан бастап жарыстарға қатысуға болатынын түсіндірді
Фото: olympic.kz
Туризм және спорт министрлігі балалардың спорттық жарыстарға қатысуының ең төменгі жас шегі туралы пікір білдірді. Ведомствоның мәліметінше, физикалық және эмоциялық жүктемелермен байланысты жас шегі белгіленген. Бұл туралы Stan.kz ақпарат агенттігі хабарлайды.
Министрліктің бұл жөніндегі ресми мәлімдемесі 2025 жылғы 28 шілдеде Instagram парақшасында жарияланды.
"Туризм және спорт министрлігі бірқатар бұқаралық ақпарат құралдарында таралған “балалардың спортпен айналысуына тыйым салу” тақырыбындағы ақпаратқа түсініктеме беруді қажет деп санайды. 2025 жылғы 16 шілдедегі №133 министр бұйрығына қатысты мұндай интерпретация шындыққа сәйкес келмейді", – делінген хабарламада.
Министрліктің дерегінше, қазір Қазақстанда 4 пен 17 жас аралығындағы 5,1 миллионнан астам бала мен жасөспірім тұрақты түрде спортпен айналысады.
"Алайда жарыстар спорттық дайындықтың бір бөлігі ретінде белгілі бір физикалық және эмоциялық жүктемелермен байланысты. Осыған байланысты жарыстарға қатысу үшін ең төменгі жас шегі белгіленді. Бұл шара бірінші кезекте балалардың денсаулығын қорғауға және ерте жаста жарақат алу қаупін азайтуға бағытталған", – деп хабарлады министрлік.
Минималды жас шектеулері спорттық федерациялардың ұсыныстары негізінде, денсаулық сақтау министрлігімен келісіліп, халықаралық стандарттарға сай енгізілгені атап өтілді.
"Бұл шаралар тек жарыстарға қатысуға ғана қатысты және балаларды спорт мектептеріне, секцияларға немесе спорттық резервті дайындайтын өзге де мекемелерге қабылдауға әсер етпейді. Сондықтан “спортпен айналысуға тыйым салынды” деген ақпарат шындыққа жанаспайды. Мұнда тек жарыстарға қатысудың жасына қойылатын талаптар туралы сөз болып отыр", – деп түсіндірді министрлік.
Жас шектеулері туралы толық ақпарат ведомствоның Instagram парақшасында жарияланған карусельде берілген.
Фото: Туризм және спорт министрлігі
Фото: Туризм және спорт министрлігі
Фото: Туризм және спорт министрлігі
Фото: Туризм және спорт министрлігі
Еске салайық, бұған дейін олимпиадалық емес спорт түрлеріне артық қаржы жұмсалғанын жазған едік. Жаттығу бағдарламаларының болмауы, спорт мектептеріндегі қабылдау жүйесінің ашық емес екені, медициналық көмектің ескіргені сияқты проблемалар да анықталды. Дирекция басшылығына 3,5 миллиард теңге көлемінде сыйақы берілген. Министрлік 2024 жылғы жаңа заң аясында спортты қаржыландыру жүйесін қайта қарағанын және ашықтықты арттыруға бағытталған жоспар қабылдағанын мәлімдеді.
"11-15 жастағылардың үлесі 2 есе артқан": Шылым шегетін жастардың санын азайту үшін мемлекет қандай шаралар қабылдап жатыр
