Атырау тұрғыны қол-аяғы жоқ екенін дәлелдей алмай жүр

Фото: azh.kz

62 жастағы Атырау тұрғыны Марат Мұханбеталиев бір жылдан бері электрлі мүгедек арбасын ала алмай келеді. Бұл туралы Stan.kz ақпарат агенттігі Ақ Жайық басылымына сілтеме жасап хабарлайды. 

2010 жылғы 15 қарашада ол жұмыстан қайтып келе жатып, пойыздың астына түскен. Дәрігерлер оның өмірін сақтап қалса да, қолы мен аяғын кесіп тастауға тура келіпті. Сол кезден бері ер адам ауыр мүгедектікпен өмір сүріп келеді.

Бастапқыда оған тек екінші топ мүгедектік берілген. Бірінші топты алуға төрт жыл бойы комиссиялардың табалдырығын тоздырыпты. 

Қазір ер адам қайтадан ұқсас жағдайға тап болған. Бірінші топ мүгедектігі барына қарамастан, комиссия оған электрлі мүгедек арбасын беруден бас тартып отыр. 

"Мен бір жарым жыл бойы әр кабинеттерде аралап жүрмін. Бірде ауруханаға, бірде кері қайтамын. Жауаптары: "берілмейді". Құжаттар дұрыс толтырылмаған дейді, бірақ олай емес. Травматолог қарап шықты, медициналық тексеруден өттім – нәтиже жоқ. Мен шаршадым", – дейді Марат. 

Жақында оның мәселесі қайтадан өз қатысуынсыз қаралған. Шешімде оның денсаулығына байланысты қатыса алмағаны айтылған. Алайда ер адам өзіне ешқандай шақыру келмегенін, отырысқа келуге мүмкіндігі болғанын айтады. 

"Бәрін менің орныма шешіп қойыпты. Ал мен жиналыс өтетінін білген де жоқпын", – дейді ер адам. 

Атырау облысы бойынша әлеуметтік қорғау саласындағы реттеу және бақылау комитеті департаментінің мәліметінше, мүгедектерді техникалық қайта бейімдеу құралдарымен, соның ішінде электрлі мүгедек арбаларымен қамтамасыз ету медициналық-әлеуметтік сараптама комиссиясының шешімі негізінде жүргізіледі. Ер адамның жағдайында департамент мәліметі бойынша электрлі арбаны пайдалану үшін қарсы көрсеткіштер анықталған, сол себепті комиссия оны бермеу туралы шешім шығарған. 

"Мен енді кабинеттен кабинетке жүгіре алмаймын. Қолым мен аяғым жоқ екенін қалай дәлелдеймін?", – дейді Марат Мұханбеталиев.