Астанада студент Таиландтан келген сәлемдеме үшін 8 жылға сотталды

Астананың қылмыстық істер жөніндегі мамандандырылған ауданаралық соты кәмелетке толмаған колледж студентін 8 жылға бас бостандығынан айырды. Бұл туралы Stan.kz ақпарат агенттігі хабарлайды. 

Фото: depositphotos.com

Соттың мәліметінше, студент Telegram мессенджері арқылы тыйым салынған заттар қоймасына жұмысқа орналасқан. Осыдан кейін оның атына Таиландтан Қазақстанға пошта арқылы 998 грамм кептірілген марихуана жіберілген.

2024 жылдың 6 тамызы күні студент өз атына келген сәлемдемені "Қазпошта" филиалынан алып кеткен. Осыдан кейін ол есірткіні дозаларға бөліп, кейін сату мақсатында заңсыз сақтау үшін пәтер жалдаған. Алайда сол күні-ақ оны полицейлер ұстап, үйін тінту кезінде 998 грамм кептірілген марихуана тәркіледі.

• Әуежайда есірткіні жаңа жылдық сыйлық ретінде өткізбек болған әйел ұсталды

• Қазақстанда есірткі тасымалдайтын курьерлер шартты түрде мерзімінен бұрын бостандыққа шықпақ

Сотталушы өз кінәсін толық мойындады. Прокурор күдіктіні 8 жыл мерзімге бас бостандығынан айыру жазасын тағайындауды сұрады.

Сот сотталушының шын жүректен өкінуін және кәмелетке толмағанын жауапкершілік пен жазаны жеңілдететін мән-жай деп таныды. 

Сот үкімімен сотталушы Б кінәлі деп танылып, 8 жылға бас бостандығынан айырылды.

Еске салсақ, бұған дейін президент Қасым-Жомарт Тоқаев есірткі өндірушілерге жазаны қатаңдататын, ал есірткі тасымалдаушыларға қолданылатын шараларды жұмсартуды қарастыратын заңға қол қойған еді.