Исекешев 121 адамды аман алып қалған “Бек Эйр” экипаж мүшелерін марапаттады
ҚР Инвестиция және даму министрі Әсет Исекешев Отан қорғаушылар күні мен Жеңіс күніне арналған салтанатты шара барысында “Бек Эйр” әуе компаниясының экипаж мүшелерін марапаттады. Бұл туралы министрліктің баспасөз қызметі хабарлады.
ҚР ИДМ
II дәрежелі “Айбын” ордені Fokker-100 әуе кемесінің екінші ұшқышы Вадим Смеречанскиге табыс етілді. “Ерлігі үшін” медалі әуе кемесінің борт серіктері Рустам Ибрагимов, Жадыра Мударисова және Александр Шестаковқа берілді.
6 мамыр күні экипаж командирі Дмитрий Родин Ақордада Қазақстан Республикасына сіңірген аса үздік еңбегі, әскери және қызметтік борышын атқару үстінде көрсеткен ерлігі мен жанқиярлығы үшін “Халық қаһарманы” атағын және Алтын Жұлдыз бен «Отан» орденін Елбасы Нұрсұлтан Назарбаевтың қолынан алды.
Еске сала кетсек, 27 мамырда Астанада “Бек Эйр” әуе компаниясының ұшағы жерге апатты жағдайда қонған болатын. Тура қону жолағына жақындаған сәтте алдыңғы шассиі ашылмай қалған ұшақты, экипаж сәтті қондырып жүздеген адамның өмірін аман сақтап қалған еді. Борттағы 121 адамның ешқайсы да зардап шекпеген.
ҚР Инвестиция және даму министрі Әсет Исекешев экипаж шеберлігін мақтап өтіп, алғыс білдірді.