Мүгедектігі бар азаматтар министрлерге кеңесші қызметіне ұсынылмақ
Қазақстанда мүмкіндігі шектеулі азаматтардың өмір сапасын жақсарту мақсатында бірнеше бағытта қызметтер атқарылып жатыр. Бүгінде 35 мыңдай нысан мүгедек азаматтардың кіріп-шығуына қолайсыз болғандықтан, жөндеу жұмыстары қолға алынбақ. Бұл туралы Stan.kz ақпарат агенттігі хабарлайды.
Фото: Pexels.com
Еңбек және халықты әлеуметтік қорғау министрі Светлана Қабыкенқызының айтуынша, 2026 жылға дейін талапқа сай емес 35 мың нысан мүмкіндігі шектеулі жандарға қолайлы етіп жасалынбақ.
"13 мыңы биыл бітеді. Кезең-кезеңмен жүзеге асады. Бұрын Жол картасы негізінде әлеуметтік жұмыстарға қаржы бөлінетін. Өмір бір орында тұрмайды. Жаңа дәріханалар, дүкендер ашылып жатыр. Биыл Өнеркәсіп және құрылыс министрілігімен бірлесіп жаңадан стандарттар қабылдадық. Ол стандарттарға сай енді тұрғызылатын құрылыс нысандары осы мүгедектігі бар азаматтардың жүріп-тұруына ыңғайлы етіп бірден салынады. Сонымен қатар алдағы уақытта әр министрге кеңесші ретінде мүгедектігі бар азаматтарды қызметке қабылдауды ұсынып отырмыз", — деді министр.
Мәжілісі депутаты Сейтжан Кенжеғұлдың айтуынша, көптеген қазақстандықтар мүмкіндігі шектеулі азаматтарды кәдімгі қарапайым адам ретінде қабылдамайды.
"Қоғамда мүмкіндігі шектеулі адамдарға ғарыштан келгендей таңырқай қарап, аяп, піссіміләсін айтып, кейде ренжіп жатады. Министрлік ананы, мынаны істесін деп, бәрін үкіметке арта бермей, барша азаматтар біз сияқты жандарды кәдімгі қатардағы қарапайым адам ретінде қабылдаса деген ниетім бар. Журналистерден сұраймын. Сіздер соны жеткізсеңіздер", — деді президент жанындағы Халықтың әлеуметтік осал топтарының құқықтары жөніндегі уәкіл, парламент мәжілісі депутаты.
Қазақстанда мүмкіндігі шектеулі азаматтар саны 725 мың. Оның ішінде 109 мыңы – балалар. Мүгедектігі барлардың ішінде жұмысқа қабілеттілерінің саны 420 мың. Соның 135 мыңы жұмыс істеп отыр.