Жапондар опырылған алып шұңқырды небәрі екі күннің ішінде қалпына келтірді (фото, видео)

Жапондықтар әлемді тағы да таңқалдырды. Бұл жолы жол жөндейтін құрылысшылардың жылдамдығы жұртшылықты тәнті етіп отыр.

Бұл туралы The Guardian хабарлайды.

Жол жөндеушілер Фукуока қаласының орталығындағы опырылып кеткен көпжолақты жолды екі күннің ішінде қайта қалпына келтірген.

Жол бойындағы қолайсыздық жер астындағы метро құрылысының әсерінен 8 қараша күні орын алған.

Оқиға нәтижесінде электробайланыс желісі, телефон желісі, газ құбыры мен су құбырларына орасан зор зиян келген.

Көлемі 30/20 метр болатын, тереңдігі 15 метрлік алып шұңқырды жұмысшылар екі күннің ішінде айнадай жарқыратып қойған.

Ал толыққанды қалпына келтіру бір апта ғана уақыт кетіпті.

Жұмыс тәулік бойы жүрген. Шұңқырдың ішіне 6,2 мың куб құм мен цемент құйылған.

Жолды жөндеу кезінде инфрақұрылым қалпына келтіріліп, асфальт төселіп, сондай-ақ, бағдаршам қойылып, арнайы жол белгілері де сызылып үлгерген.

Қала мэрі Соитиро Такасима қалалықтардан орын алған қолайсыздық үшін жазбаша кешірім сұрады.