"Жаңа геосаяси жағдайдағы бірегей құжат": Тоқаев жаңа Конституцияға баға берді

Фото: akorda.kz

Президент Қасым-Жомарт Тоқаев Алматыдағы ғылым өкілдерімен кездесуінде жаңа Конституцияны “Халық Конституциясы” деп атады. Бұл туралы Stan.kz ақпарат агенттігі хабарлайды. 

Мемлекеттік жаңа Конституцияның ең алдымен адамға бағдарланғанын атап өтті. 

“Біз Жаңа Конституцияда адам капиталын, білімді, ғылымды, инновацияны дамытуды мемлекет қызметінің стратегиялық бағыты ретінде бекіттік. Енді бәріміз бұл мақсатты міндетті түрде іске асыруымыз керек. Басқа жол жоқ. Бұл – өте күрделі міндет, оны түсінуіміз керек. Осы мақсатқа қол жеткізу үшін ғылым қауымдастығы кәсіби біліктілік, адалдық және отаншылдық қасиеттерін танытуы қажет. Мен сіздерге үміт артамын”, – деді президент. 

Тоқаев Қазақстанның жаңа жаңа Конституциясын “жаңа тарихи, геосаяси жағдайдағы бірегей құжат” деп атады.

“Елдің шынайы жаңаруы саяси ұраннан емес, құқықтық іргетасымызды жаңаша қалыптастырып, бекітуден басталады. Біз бір ел, бір жұрт болып осы аса маңызды жұмысқа кірістік. Жаңа Конституция елдігіміздің тірегі, егемендігіміздің тұғыры болады. Оның әр бабы, әр тармағы елдігімізді нығайта түседі. Біз Ұлы даланың мыңдаған жылдық тарихының сабақтастығын сақтауға баса назар аудардық. Бабаларымыз әуел бастан құқықтық мемлекет құруға ерекше мән берген. Қасым ханның қасқа жолы, Есім ханның ескі жолы, әз Тәукенің Жеті жарғысы – соның айқын дәлелі. Қуатты, Күшті, Бәсекеге қабілетті Қазақстанның жаңа Жарғысы – жаңа тарихи, геосаяси жағдайдағы бірегей құжат. Оның тарихымыздағы орны ерекше. Бұл – азаматтарымыздың арман-тілегінен, мақсат-мұратынан туған қастерлі құжат, шын мәніндегі Халық Конституциясы”, – деді мемлекет басшысы. 

Еске салсақ, бұған дейін Тоқаев "әлемдік өркениеттен кері қалмау" үшін не істеу керегін айтқан еді.