UFC лигасында тағы бір қазақ жауынгері өнер көрсетуі мүмкін
Қазақстандық Alash Pride лигасында өнер көрсететін Саламат Исбулаев UFC лигасында өнер көрсетуі мүмкін. Бұл туралы Stan.kz ақпарат агенттігі Sports.kz порталына сілтеме жасап хабарлайды.
Фото: Stan.kz
Саламат Alash Pride сапында 8 жекпе-жек өткізіп барлығында жеңіске жетті. Спортшы жақында ғана Қазақстан азаматтығын қабылдаған еді. Орынборда дүниеге келген Исбулаев 2023 жылдан бері елімізге көшіп келген болатын.
“Аралас жекпе-жектегі кәсіпқой мансабымды бастағанда тарихи отаныма қайта оралу керек деп шештім. Оның үстіне отбасым, спорттағы жаттығулар Қазақстанға ат басын бұруыма да себепкер болды”, – дейді Исбулаев.
Дереккөзге берген сұхбатында, спортшы жақын арада UFC-де өнер көрсетіп қалуы мүмкін екенін де жасырмады. Аралас жекпе-жек шебері америкалық лигамен арада келіссөздер жүріп жатқанын айтты.
“UFC? Қазір келіссөздер жүргізілуде, Америкадан өзімде жақсы жаңалық күтіп отырмын. Оларға тағы қанша жекпе-жек өткізу керек екенімді білмеймін. Бірақ осыған дейінгі кездесулерім аз болса тағы да керемет жекпе-жектер өткізетін боламын. Әзірге сәуірдің соңына қарай Alash Pride лигасында жоспарланған бір кездесуім бар. UFC-ден өзге шетелдік ұйымдарда өнер көрсету ойымда жоқ”, – деді Саламат.
