УЕФА Конференция лигасы: Астана соңғы матчында жеңіске жете алмады
"Астана" футбол клубы УЕФА Конференция лигасы аясындағы соңғы матчын өткізіп, тағы да жеңіске жете алмады. Бұл туралы Stan.kz ақпарат агенттігі хабарлайды.
Фото: Астана ФК
Елордалық "Астана" командасы УЕФА Конференция лигасы аясында Кипр астанасы Никосияда жергілікті "АПОЭЛ" командасына қарсы ойын өткізді. УЕФА Конференция лигасының жалпы кезеңінің соңғы 6-туры аясында өткен бұл ойында "Астана" командасы қарсыласымен 1:1 есебімен тең түсті. Ойынның 57-минутында "АПОЭЛ футболшысы Анастасиос Донис есепті ашса, матчтың 64-минутында "Астана" ойыншысы Кипрас Казуколовас есепті теңестірді. Осылайша "Астана" футбол клубы УЕФА Конференция лигасының жалпы кезеңінде 5 ұпай жинақтап, турнир кестесінің 28-орнына жайғасты.
Айта кетейік, жарыстың жаңа ережесі бойынша жалпы үздік шыққан сегіз команда 1/8 финалға тікелей жолдама алады, ал 9-24-орын алған клубтар қосымша ойындар өткізеді. Жеңіске жеткен командалар 1/8 финалға шығады.
