Түркістан облысында оқушылар арнайы мектеп-интернаттан жаппай шығарылып жатыр: Облыстық білім басқармасы жауап берді

Фото: Видеодан скрин

Бұған дейін Түркістан облысы Төлеби ауданындағы ерекше балаларға арналған мектеп-интернаттағы тәрбиеленушілер білім беру ұйымынан жаппай шығарылады деген ақпарат тараған еді. Облыстық білім басқармасы өкілдері осы ақпаратқа пікір білдірді. Бұл туралы Stan.kz ақпарат агенттігі хабарлайды.

Еске салсақ, таяуда Ленгір қаласындағы №2 мектеп-интернат тәрбиеленушілерінің ата-аналары денсаулығында кемістігі бар балаларды мектеп-интернаттан шығарып, жай мектептерге ауыстыру туралы шешім қабылданғанын хабарлаған еді. Мұндай шешімді, ата-аналардың сөзінше, білім беру ұйымына ескертусіз барған арнайы комиссия қабылдаған.

Мұғалімдер бұл ақпаратты растап, көптеген бала жай мектепте білім алуға физикалық немесе психологиялық тұрғыдан дайын еместігін атап өтті. Олар, бұған қоса,  мұғалімдердің де жұмыстан босатылуы мүмкін екенін айтты. Олардың пікірінше, мұндай шешім қабылдауға мектеп ғимаратына деген қызығушылық себеп болуы мүмкін.

Ал Түркістан облысы білім басқармасының баспасөз қызметі ерекше білім беруді қажет ететін балаларға арналған мектеп-интернатынан оқушылар жаппай шығарылып жатыр деген ақпаратты жоққа шығарды.

Ведомство өкілдері барлық бала жеке мүмкіндіктері мен қажеттіліктерін ескере отырып оқуын жалғастыратынын атап өтті.

“Оқушыларды оқудан шығару туралы ешқандай шешім қабылданған жоқ. Барлық бала оқу түріне қарамастан, мемлекеттік жалпыға міндетті стандартқа сәйкес білім алуын жалғастырады. Баланың жалпы білім беретін мектепке ауысуы – міндет емес, өз құқығы. Ол тек ата-аналардың (заңды өкілдердің) өтініші бойынша және мамандардың ұсыныстарын ескере отырып іске асырылады", - деп хабарлады Түркістан облысы білім басқармасының баспасөз қызметі. 

Білім басқармасындағылар психологиялық-медициналық-педагогикалық комиссияның қызметі тек кеңес беру сипатында екенін атап өтті.

"Комиссия мекемелерді жабу немесе балаларды оқудан шығару туралы шешім қабылдамайды. Оның мақсаты – баланың дамуына және қоғамға бейімделуіне ықпал ететін кәсіби негізделген ұсыныстар беру. Білім беру түрін таңдау бойынша түпкілікті шешімді ата-ана қабылдайды", - деді облыстық білім басқармасының баспасөз қызметі өкілдері.

Білім басқармасының өкілдері бұл түсіндірмені мектеп мұғалімдері мен ерекше қажеттіліктері бар оқушылардың ата-аналарына да ұсынды.