Түркістан облысында қазақ тілі пәнінің мұғалімі 10 жылға бас бостандығынан айырылды

Түркістан облысында есірткі сатқан мұғалім 10 жылға сотталды, деп хабарлайды Stan.kz ақпарат агенттігі Polisia.kz сайтына сілтеме жасап. 

Бәйдібек аудандық полиция бөліміне жергілікті тұрғындардың бірінен аудан тұрғыны есірткінің ірі көлемін заңсыз сақтап, өткізумен айналысатыны туралы хабарлама келіп түскен.

Полицейлер бірден жедел іздестіру іс-шараларын жүргізіп, нәтижесінде есірткі сату қылмысына қатысты күдіктіні қолға түсірген. Ол аудан мектептерінің бірінде қазақ тілі пәнінен сабақ беретін мұғалім болып шықты.

Жедел уәкілдер ұсталған адамның тұрғылықты мекенжайын тінту кезінде оның асханасындағы шкафтың үстінен 10 дана бөлек пакеттерге салынған хош иісті, жасыл түсті, есірткіге ұқсас затты тауып, тәркілеп алды. Сонымен қатар асхана шатырының үстінен ақ қапқа салынған есірткі затына ұқсас жасыл түсті зат тапқан.

• "Өз анасымен соттасқаны үшін еш шімірікпейді": Марғұлан Сейсембай Мұхтар Тайжаннан кешірім сұрады


• "Сәттілік жетіспей қалды": Олимпиада жүлдегері Қамшыбек Қоңқабаев полициядағы жұмысы, спорттық мансабы мен алдағы жоспарлары жайлы айтты

Сараптама қорытындысы бойынша күдіктіден алынған заттар жалпы салмағы 3 келіден астам "кептірілген марихуана" болып шықты. Тергеу барысында күдікті есірткі заттарын сату үшін пакеттерге бөліп салғанын мойындады. Күдікті қамауға алынды.

"Күдіктіден барлық айғақ зат тәркіленді. Жинақталған іс-құжаттары айыптау актісімен аудандық сотқа жолданды. Сот үкімімен 47 жастағы күдікті Қазақстан Қылмыстық кодексінің 297-бабымен кінәлі деп танылып, оған 10 жыл мерзімге бас бостандығынан айыру жазасы тағайындалды", – деп атап өтті тергеуші Асқар Шубай.