Биыл даңқты боксшының туғанына 45 жыл толуына орай Түркістан музыкалық-драма театры көрерменге Қуат Ежембектің "Бекзат" драмалық қойылымын тарту етеді. Киелі Түркістан топырағында дүниеге келіп, қазақ спортының айбынды жұлдызына айналған, Олимпиада чемпионы Бекзат Саттархановтың өмір жолы сахналанған қойылым – театрдың V-маусымының алғашқы премьерасы.

Қойылым идеясының авторы – Асылхан Төлепов. Жоба жетекшісі – Айгерім Бозщина. Пьесаның авторы – Қуат Ежембек. Қоюшы режиссері – Carlo Sciaccaluga. Жарық бойынша суретші – Gaetano La Mela. Қоюшы режиссері –Carlo Sciaccaluga, ал режиссері – Giorgia Coco. Қойылым композиторы – Хамит Шанғалиев.

Бекзаттың спорт жолы алғаш рет бапкері Нұрлан Жұмабаевтың қолында басталды. Кейін ол ұлттық құраманың танымал жаттықтырушылары – Александр Апачинский пен Тұрсынғали Еділовтің қолдауымен халықаралық аренаға жол ашты. Олимпиада қарсаңында ол еліміздің әйгілі спорт саңлақтары – Ермахан Ибраимов, Болат Жұмаділов, Мұхтархан Ділдабековпен жақын араласып, олардың тәжірибесінен тағылым алды.

Қойылым тек шаршы алаңдағы жеңістерді ғана емес, сонымен бірге ананың алаңдаған жүрегін, әкенің үкілі үмітін, алғашқы махаббаттың мөлдір сезімін, жарыстардағы бәсекелестікті, жеңіс пен жеңілістің ащы-тәтті сәттерін де сахнада шынайы жеткізеді. Осылайша, көрермен Бекзаттың спорттық биіктерін ғана емес, оның адами болмысын, нәзік сезімдерін, отбасылық құндылықтарын және ел алдындағы жауапкершілігін де танып біледі.

Басты рөлдерде ойнайтындар: Қадыржан Төреханов, Досымжан Арқабеков, Ақ-Сұлтан Әнуарбек, Шерхан Саматұлы, Темірлан Еркінғалиев, Мұзафар Ғалымжанұлы, Данияс Нұрқабден, Мерей Құдайбергенов, Динар Қалдыбай, Темір-Сұлтан Мейірбек, Инабат Абытхан, Аида Серикова, Ақбөпе Сәбет, Айдана Аққали, Ұлан Әділбек, Сембай Нұрла.