"Тапаншаны сатқан ақшаға гүл алдым": Түркістан облысында қару ұрлап қашқан әскери сотқа түсінік берді
Түркістан облысында әскери бөлімнен қару-жарақ ұрлады деп айыпталған кіші сержант өз әрекетін "Командирлердің бірінің бұйрығын орындадым", деп түсіндірген. Соттың отырысында қылмыстық істің басты фигуранты Абылай Балғынбай аты шулы оқиғаға қатысты түсінік берді.
Оның айтуынша, бұл іске әскери бөлім командирінің міндетін уақытша атқарушы Ержан Дауытов итермелеген. Ол тіпті қорқытты деп отыр.
Соның тапсырмасымен сарбаз қаңтардың 13-і күні әскери бөлімнен тапанша алып шығып, тығып қойған. Екі аптадан соң 11 тапаншаны ұрлап әкеткенін баяндады. Ал, ақпан айының 19-ына тапаншадан бөлек бірнеше автоматпен қоса оқ-дәрілерді қоймадан алып шыққан.
Сотта жауап берген әскери өзі ұрлап әкеткен алғашқы тапаншаны сыбайластары арқылы 120 мың теңгеге сатқанын да жасырмады. Одан көрген пайдаға командирінің кездесіп жүрген қызына гүл әпергенін де жайып салды.
"Майор Дауытов Ержан Есімұлы , ол кезде әскери бөлім командирінің міндетін уақытша атқарушы сол кісі ұсыныс білдіріп, егер келіспеген жағдайда менің туысқаным, әкемнің ағасының баласы менімен бірге бір жерде жұмыс істеймін, сол ағаңды және өзіңді бір күнде жұмыстан шығарып қуып жіберемін деді. Егер ұсталған жағдайда мені білесің , ағам бар, әскери полицияның бастығы..подполковник Дауытов, атын білмеймін", - деді айыпталушы Абылай Балғынбай.
Еске салайық, биылғы ақпан айында Түркістан облысында кіші сержант қызметкері қоймадан қару-жарақ ұрлап, 20-сына қараған түні қызметтік орнынан өз еркімен кетіп қалған. ІІМ мен Ұлттық қауіпсіздік қызметкерлері жүргізген жедел операция кезінде ол көп ұзамай Алматыдан ұсталған.